Atualità
Gran interès por le conzert dles Ganes, ambasciadësses ladines
USP - En sabeda al pröm d’otober saràl da aldì por le pröm iade le grup Ganes tla Val Badia. Les chertes por le conzert dales 8 da sëra tla Ciasa de Cultura a La Ila é bele dötes gnüdes venüdes. Chësc desmostra le gran suzès por la scomenciadia dl Istitut Ladin Micurà de Rü, che à orü ti dè l’ocajiun ala jënt ladina de aldì a Ciasa le trio badiot che à portè les Cianties ladines al publich foradecà.
Les trëi ambasciadësses y musizistes ladines sarà por le pröm iade da aldì tla Val Badia sciöche grup Ganes al pröm d’otober - chësc sön scomenciadia dl Istitut Ladin „Micurà de Rü“. Maria Moling, Marlene y Elisabeth Schuen s’la conforta dër a so pröm conzert tla Val Badia, chësta é na ocajiun che ares aspetâ bele da dî.
Tl Südtirol éres bele stades de plü iadi a sonè y tl dagnì jìsseres ion a portè dant süa musiga inće tl rest dla Talia, sciöche inće tla Franzia y tla Spagna. Te chisc paîsc gniss i tesć por ladin de sües ćianties dessigü capis plü saurì, inće sce le lingaz ne n’é nia stè n impedimënt por le publich che é jü a les ascutè. Aladô dles ambasciadësses ladines tl monn dla musiga, é la jënt che va a ascutè scialdi interessada ales cultures y daverta a d’atri lingac. “Tröc se interessëia dër al ladin y mët man da imparè val’ parora y n valgügn vëgn inće chilò adalerch por odëi da olache chësc lingaz vëgn“ dij les Ganes.
Al é oramai passè dui agn da canche Marlene, Elisabeth y Maria à metü man de sonè y ćiantè adöm sciöche Ganes. Döt é pié ia sön la barca dla Linz Europa Tour 2007-2009 de Hubert von Goisern, olache ares à ćiantè y sonè para.
Te dui agn àres fat tröpa strada: ares à tut sö dui cds y so pröm video-clip musical y fat za. 100 conzerć al ann. Ares à venü 12.000 cds y tut pert a tröpes trasmisciuns radiofoniches y televisives (BR, Rai (Südtirol), rbb, SWR, radio 1 (Berlin), HR, NDR, ZDF, ORF, servus tv, SR). Ares à ciafè na gran atenziun da pert dla stampa, cun de bunes critiches y rezenjiuns, danter ater dala Süddeutsche Zeitung y dal Rolling Stone talian. Ares é gnüdes descrites sciöche „strahlende Südtirolerinnen, zauberhafte Cousinen, verführerische Popjuwelen“ che fej „ein Mix aus Pop, Soul und Weltmusik in perfekter Balance“.
Danter i momënć plü importanć de Ganes él le Festival a Kaltenberg, olache ares à indô incuntè Hubert von Goisern, le Hafenfest a Linz olache ares à ćiantè adöm cun düć i musizisć che à tut pert ala Linz Europa Tour 2007-2009 (Xavier Naidoo, Konstantin Wecker, Zap Mama, Bap, ...). A Bonn àres ćiantè cun le grup Bap dan da 8.000 porsones. Da recordè é spo le conzert cun la Babelsberger Filmorchester che é gnü tut sö y che an po aldì en pert tl secundo CD (tla versciun dopla). Ares é stades ala Weltmusikmesse a Copenhagen, al Reeperbahn Festival a Hamburg, da püch al Filmfestival de Aunejia: döt chësc cun ćianties ladines scrites da ëres instësses.
Na novité interessanta é spo dessigü le pröm video-clip cun la ćiantia „Bun sciöch’al é“ tuta sö mesa por inglesc, cun le remix de Alex Trebo, dal titul „Bun chaka le“, che vëgn da śëgn inant lascè odëi y aldì ti Mac Donalds dla Germania por n valgönes edemes.
as
