Atualità
Prim pest dl cuncors de leteratura ladina a Tobia Moroder
USP – Tobia Moroder de Urtijëi à venciù l prim pest dl cuncors de leteratura ladina metù a jì dal Assessorat provinziel Ladin. Chëst iede vëniel partì ora de plu pesc’: l segondo pest ie jit a Ruth Videsott y tla categuria di jëuni iel mé unì dat ora n segondo pest che ie jit a Julia Runggaldier. L’opres letereres unirà publichedes y d’ansciuda prejentedes pra na premiazion.
Opres letereres ti dà na majera richëza a na rujeneda. Cun chësc pensier à la Provinzia de Bulsan chëst ann inò sustenì autëures ladins metan a jì n cuncors de leteratura. Tla categuria sëura 20 ani à Tobia Moroder venciù l prim pest cun si pez “Testamënt a jënt scunesciuda”. L segondo pest ti ie jit al pez “I confins dla liberté” de Ruth Videsott. Tla categuria di jëuni (danter i 16 y 19 ani) ne iel nia unì dat ora l prim pest. L segondo pest ie jit a Julia Runggaldier che à scrit l pez “L pra che ne ie nia”.
L nteres per chësta terza edizion dl cuncors "Autëures Ladins Scrj” ie stat grant, chësc desmostra la bela cumpëida de 53 lëures mandei ite. Permez al’edizion 2008 iel unì dat ju cin iedesc mo ntant de pec letereres.
“Trueps se à tëut su de scrì per l cuncors y chësc uel dì che l fin de chësta scumenciadiva ie unì arjont cun suzes” dij l assessëur ladin Florian Mussner.
Sëuraprò ai pesć che unirà dai ora tla doi categuries à la giuria damandà na recunescënza straurdinera per l pez “L fova n iede te Gherdëina”, na saga de cater families tres trëi generazions” de Ivan Senoner.
La giuria de esperc sorissea la bona cualità dl’opres mandedes ite per la categuria sëura 20 ani. L lëur de valutazion di pec letereres se à sëurantëut Marco Forni (presidënt), Roberta Dapunt, Isabella Ties, Claus Vittur y Margherita Senoner.
“Cun chësc cuncors ons purvà a de ueia a scrì per ladin y a judé a ti vester al festide de scrì te nosta rujeneda dl’oma. 43 opres tla categuria di jëuni y 10 te chëla prinzipela ie stata na resposta plu che positiva a nosc nvit” dij Alexander Prinoth, diretëur de repartizion.
Per la terza edizion dl cuncors de leteratura iel unì damandà de scrì stories per jëuni che trata de curaje zevil, dl daunì o dla lidëza. Duta l’opres mandedes ite trata una o de plu dla trëi tematiches te na maniera desvaliva. L’opra de Tobia Moroder “Testamënt a jënt scunesciuda” ie la storia de Peter Staetenekke che cëla de reviers sun si vita y conta la storia de si slata. La ie na cumbinazion danter storia, fantajia y reflescions dl prutagonist sun l daunì y l senificat dla vita. L’opra ie rica de simboi y la à n mëudl stilistich defin persunel.
“I confins dla liberté“ de Ruth Videsott ie n’opra scrita cun na gran sensibilità che descëida de gran emozions. La ie la storia tragica de doi ëiles. A tramedoves ti vëniel tëut la lidëza de viver si vita.
“L pra che ne ie nia” de Julia Runggaldier ie n’opra danter surealism y realism che sperimentea cun l simbol dl pra vërt sciche luech de lidëza.
Per purté l opres letereres nueves nce danter la jënt ladina uniral dat ora n liber. Tlo uniral publicà i trëi pec premiei plu mo d’autri trëi pec sun pruposta dla cumiscion. Dla categuria sëura i 20 ani uniral nsci publicà i pec “Testamënt a jënt scunesciuda” de Tobia Moroder, “I confins dla liberté” de Ruth Videsott, “Resté nsci per for” de Elisabeth Caterina Kostner y “Al basta daorì i edli” de Simon Kostner. Di autores jëuni uniral publicà i pec “L pra che ne ie nia” de Julia Runggaldier y “L tëmp dla vita” de Elena Demetz.
Tenian cont dla singolarità y dla valuta dl romann “L fova n iede te Gherdëina” de Ivan Senoner unirà chësc publicà te n liber a pert. L autëur se à dat ju cun la vita passeda de nosc raion ti cialan cun i uedli de n jëunn da al didancuei tratan nce la tematica dl’opzion.
Dan lascé stampé i libri uniral mo scrit ora n cuncors per la grafica di cuiertli dla doi publicazions y l unirà nce letorà i pec. La premiazion cun letura ora dla publicazions ie ududa dant per l’ansciuda 2012.
La rujeneda ladina à tres l’opres letereres dla terza edizion dl cuncors leterer “Auturs ladins scrî…” giapà n arichimënt y n mpuls nuef. “Te chëla che i libri nueves ruverà tla families y tla scoles puderan se dé ju cun leteratura ladina nueva. L ie n n ziedl nuef acioche nosta rujeneda ladina devënte plu sterscia y plu nraviseda danter la jënt” dij l Assessëur Ladin. La fazion dl cuncors ne ie nia me tla cuantità ma nce tla cualità. “La giuria se à dat ju dassënn y à fat n bon lëur. Ëi à nce auzà ora la bona cualità di pec nueves de leteratura ladina” nsci l diretëur dl Ufize Cultura Ladina.
Categuria sëura 20 ani
Prim Pest: “Testamënt a jënt scunesciuda” de Tobia Moroder
Segondo pest: “I confins dla liberté” de Ruth Videsott
Categuria jëuni
Segondo pest: “L pra che ne ie nia” de Julia Runggaldier
---
D'autri comunicac stampa sun chësc argumënt
24.02.2011 - Nuef cuncors de leteratura ladina: sustëni ala rujeneda
03.05.2011 - Ultima cater enes per mandé ite pec de leteratura ladina
16.05.2011 - 31 de mei: ultimo di per l cuncors de leteratura ladina cun publicazion
as
