Atualità
Gran nteres a Klagenfurt per l model dla scolines ladines
USP – Pra l cunvëni sun l plurilinguism ti prim ani de vita RML2future a Klagenfurt à la prejentazion dl model plurilinguistich dla scolines ladines abù gran suzes. I partezipanc da de plu nazions à mustrà gran nteres per l model che ti vën pità ai mëndri y ala mëndres tla valedes ladines.
75 reprejentanc de mendranzes tl’Europa y cumëmbri la rë per plurilinguism y varietà linguistica tl’Europa se à ala fin de setëmber ancuntà a Klagenfurt per mparé a cunëscer modiei de nseniamënt plurilinguistich. Se stizan sun esperienzes iel unì prejentà y analisà cunzec, didatiches, manieres de lëur cun nce cundizions y ndicazions metudes dant dal’aministrazions. Dlongia i proiec dla mendranza slovena tla Carinzia, se an te na maniera particulera dat ju cun l mparé rujenedes ti prims ani de vita. Ejëmpli cuncrec che ie unic prejentei à mustrà su la situazion tla valedes ladines, chëla di Sorben a Lusitz, dla mendranza dl Schleswig ti raions de cunfin danter l Dänermark y l Deutschland, i tudësc tl Belgien, ma nce tl Westfriesland, Wals, ti Grijons y tl Burgenland.
L model dla scolines ladines ie unì prejentà da Frida Comploj y Ingrid Mussner che à pudù pië do truepa laudes per chësc model che fej da scola a d’autra mendranzes. Davia che l ie unì mustrà tan n gran nteres, à i urganisadëures damandà te mantenì l cuntat cun i respunsabli dla scolines ladines per pudëi lauré ora proiec deberieda tl daunì.
De plu sun l cunvëni y i cuntenuc tratei a Klagenfurt ie publichei sun la plates web www.rml2future.eu.
as
