Atualità
Ai 9 de nuvëmber da piz a cianton cun Rut Bernardi
USP - N mierculdi ai 9 de nuvëmber liej Rut Bernardi ora de si ultima publicazion “Lirica y prosa da piz a cianton”. La sëira de leteratura a Bulsan metuda a jì dal Assessorat ala Cultura Ladina deberieda cun l Südtiroler Künstlerbund pieta ucajion per mustré su la vivanda dla leteratura ladina te na culaburazion sëura la sëides ladines ora. Do la letura uniral tenì na descuscion sun la rujenedes de mendranza tla leteratura.
Tla sëira de leteratura, che scumëncia dala 20.00 tl Hotel Laurin a Bulsan uniral nce prejentà l liber nuef “Lyrik und Prosa kreuz und quer. Lirica y prosa da piz a cianton”. L se trata de n’antologia dl’opres letereres de Rut Bernardi di ultimi 20 ani. Chësc liber dat ora dal Edition Mosaik (Hermagoras/Mohorjeva Verlag - Klagenfurt/Celovec) ie esprescion de culaburazion nternaziunela y juda pro a se paredlé cun d’autra situazions de mendranza. Nsci uniral do la letura a Bulsan nce tenì na descuscion sun la tematica “Rujenedes de mendranza tla leteratura”. Ala descuscion tulerà pert l’autëura Rut Bernardi, l editëur Adrian Kert, l pruf. Reinhard Kacianka y l pruf. Hans-Georg Grüning. La moderazion vën sëurantëuta da Erna Flöss. Danora puderan audì i saluc dl diretëur dla Repartizion Cultura y Ntendënza ladina Alexander Prinoth y na ntroduzion y rezenscion de Ferruccio delle Cave, Vizepräsident dl Südtiroler Künstlerbund ulache l mëina l "Kreis Südtiroler Autorinnen und Autoren".
Per l Assessorat Ladin ie la sëira ai 9 de nuvëmber na ucajion de valor per prejenté la leteratura ladina nce ora dl raion ladin. “L'opres che sarà da audì testemunieia na rujeneda che viv y na leteratura che se svilupea” spiega l assessëur Florian Mussner. Che na lia renumeda sciche l Südtiroler Künstlerbund dedichea lerch a n’autora ladina ntan si lingia de sëires de leteratura "von worten|an orten”, vën tëut su sciche sëni de stima de vieres dla jënt ladina.
Rut Bernardi ie una dla reprejentantes plu mpurtantes dla leteratura ladina de al didancuei y chël nia mé coche scritëura de lirica, prosa y teater, ma nce coche tradutëura y tuadëura che se dà ju cun leteratures tlamedes „mëndres“ y la problematiches linguistiches liedes limpea. Tres l radio y la televijion ti portela dant al publich si cunescënzes n cont dla rujeneda, leteratura y cultura ladina. La vita tla pitla zità de Tluses, te n ambient tudësch-talian-ladin, l se muever danter la rujenedes y l se dé ju cun si rujeneda dl’oma à nfluenzà dassënn la tematiches de si tesć.
L romann „Lëtres te n fol/Briefe ins Nichts“ (1996/2003) conta la storia de na muta che devënta stomia per prutesta. Tl zënter de si lirica – che ie n pert sperimentela y artistica, n pert scrita tla forma rigurëusa dl sonet – iel pertes dl corp, tieres, cosses de adurvanza dla vita da uni di, elemënc ora dla mitologia ladina.
---
Biografia: Rut Bernardi ie una dla poetes plu mpurtantes tla rujeneda ladina. La ie nasciuda a Urtijëi te Gherdëina. Do si stude de romanistica a Dispruch àla laurà coche publizista, redadëura, jurnalista y scritëura. La à giapà de plu pesć y stipendiums, danter auter n stipendium per sté n ann a Viena dal Ministere austriach per l’educazion, la scienzes y la cultura (2003) y l pest de sustenimënt Walther von der Vogelweide (2004). Al mumënt scrijela na storia dla leteratura ladina per l’ Università Liedia de Bulsan.
as
