Atualità
L assessëur Mussner n cont dla mort de Frida Piazza
Ai 3 de nuvëmber 2011 ie morta Frida Piazza, una dla pionieres dla nrescida dla rujeneda ladina y na scritëura fina y inuvativa. L assessëur ladin Florian Mussner lecorda anda Frida y manda si cunduel a chëi de familia.
L ie for n gran desplajëi canche na persona se n va dala vita. Ma canche l se trata de zachei che à fat truep per l bën de na cumenanza ie la mueia per duc mo majera. Frida Piazza à dedicà truep ani de si vita ala rujeneda, ala leteratura y ala cultura ladina. Ëila ie stata danter la primes te Gherdëina che ova scumencià do la Segonda Viera a se dé ju cun la rujeneda ladina. Chësta ne fova te chëi ani nia te de bona cundizions: si prestisc fova bas, puec semiova se nteressé d’ëila, l ladin ne univa nia nsenià tla scoles, tan che deguni mparova a scrì y a adurvé la regules dl ladin – deplù: l ne fova nianca mo degun manuai de regules a chëi che n ëssa pudù se tenì. Te chësta cundizions à Frida Piazza metù man si lëur de nrescida linguistica, de scritura, de traduzion. Tres tuédes sfadiëuses che à durà ani à ëila salvà dal arbandonn de vedla paroles che fova bele tan che desmincedes. Chiran, crian y adatan paroles nueves tl ladin per n’adurvanza plu moderna tla vita da uni di àla arichì l gherdëina y slargià si pusciblteies d’esprescion.
Ma la nrescida linguistica ne ie nia l sëul merit de Frida Piazza. Ëila se à nce mpenià coche scritëura se fajan de chësc viers n inuem sëura la valedes ladines ora. Dlongia na lingia de poejies y stories, ma nce scric de sagistica publichei tla Usc di Ladins y tl Calënder de Gherdëina àla dat ora ntëur n vint libri. Danter chësta publicazions tòl si romann L nost (1988) – coche prim romann ladin – dessegur ite na luegia de mpurtanza particulera. Oradechël reprejentea nce si traduzions n cuntribut de gran valor per la produzion leterera ladina. Cun chëstes à l’autota defati giaurì l ladin ai mpulsc y ala nfluenzes dla leteratura mundiela, ma nce mustrà su pusciblteies nueves d’esprescion y d’adurvanza dl lessich.
Zënza Frida Piazza ne fossa l ladin de Gherdëina al didancuei nia chël che l ie: na rujeneda adateda per uni raion y situazion dla vita da uni di: per la vita privata, la scola, l’aministrazion, l ciamp giuridich, la scienzes y la tecnica, la leteratura y l’ert. Die tl paie, anda Frida!
L Assessëur ladin, Florian Mussner
usp
