Atualità
17 nuvëmber per mparé a cunëscer l Lizeum d’Ert a Urtijëi
USP – La Scola d’ert a Urtijëi ie dal 1872 cunesciuda per si gran tradizion. Cun la reforma dla scola auta ala chësta ann mudà inuem y se tlama sën Lizeum d’Ert. Che l ne ie nia me mudà l inuem ma che l nseniamënt ie unì adatà ai tëmps dajan majer pëis ala rujenedes, mantenian na gran pert pratica y juntan l nseniamënt de design, puderà uni un nstës jì a cialé: n juebia ai 17 de nuvëmber vëniel tenì n di dla porta davierta.
Rujenedes y na gran pert pratica ie doi ponc zentrel dl nseniamënt che vën pità tl Lizeum d’Ert a Urtijëi. Dlongia tudësch y talian iel cun la reforma nce unì juntà na segonda ëura de ladin y mplu vëniel nce nsenià nglëisc. “Na gran mpurtanza dajons daniëura nce ala materies pratiches che vën nseniedes te berstot, la vela va tlo dal dessëni, depënjer nchin ala grafica, ma sambën nce disciplines figuratives sciche l mudelé y ziplé” spiega la diretëura nueva Elisabeth Baur. Da nuef iel nce che l vën laurà deberieda danter la materies artistiches, cun nchinamei vel ëura de nseniamënt deberieda. Filiosofia ie na materia defin nueva.
Cie che l nseniamënt dl Lizeum d’Ert a Urtijëi pieta plu avisa puderà n juebia ai 17 de nuvëmber uni un nstëssa jì cialé. N ucajion dl di dla porta davierta uniral nce pità lezions spezieles dedichedes a fabules, l oroscop celtich, i abitanc antics di bòsc y l bosch. Ejëmpli de lëures sun la leteratura puderan mparé a cunëscer te n café leterer y na gran vela de ejëmpli de nseniamënt puderan nce udëi tla berstotes. Sculeies, genitores y duc i nteressei puderà tlo udëi coche vën nsenià a ziplé, la proietazion, tecniches dl stampé, mudelé, dessëni geometrich, dessëni, body painting, pitura y fotografia.
La portes dl Lizeum d’Ert (streda Rezia 293 a Urtijëi) resterà ai 17 de nuvëmber daviertes a duc danter la 9 y la 12 danmesdì y dala 2 ala 4 domesdì.
as
