Atualità
Ai 5 de dezëmber onoranzes ai volontars dla cultura ladina
USP - Ai 5 de dezëmber, le dé internazional dl volontariat, ô l’Assessorat Ladin onorè i volontars che se dà ca por la comunanza en cunt de cultura ladina. Cun na festa culturala a La Ila ô l’assessur Florian Mussner ti di ofizialmënter dilan a düc i volontars. En chësta ocajiun ti gnaràl ince surandè na onoranza a n volontar de vigni comun, che é de ejëmpl tl ciamp dla cultura.
L’Assessorat Ladin valorisëia i volontars ajache nosta cultura vir y se svilupëia dantadöt por mirit de tröc volontars che se dà jö cun ligrëza y costanza cun la cultura. Le laûr de volontariat é na desmostraziun dl impëgn atif di zitadins y dles zitadines che dà ca so tëmp lëde por valurs sciöche la solidarieté, la cultura y le tignì adöm a livel sozial, cultural y uman. “Le laûr de volontariat ti dà dessigü a vignun la poscibilité da imparè tröp, y al se deura portes y orizonć nüs, mo al se damana inće tëmp, impëgn y energies” sotrissëia l’assessur provinzial ladin.
Düć chi che se dà jö cun le volontariat, les autoritês y dötes les porsones interessades é dër bel invià en lönesc, ai 5 de dezëmber, dales 18.00 tla Ćiasa de Cultura a La Ila.
---
I colaboradus di media ladins é dër bel invià a chësta manifestaziun culturala.as
