Atualità
Assessëures ala scola anconta l Cunsëi naziunel dl’istruzion publica
USP – I assessëures provinziei ala scola Mussner, Kasslatter Mur y Tommasini à (NCUEI) ai 30 de nuvëmber ancuntà l Cunsëi naziunel dl’Istruzion publica che ti unì n vijita a Bulsan. Te chësta ucajion à i respunsabli de nosta scoles pudù prejenté la situazion particulera y curé i raporc cun i respunsabli a livel naziunel.
L Cunsëi naziunel dl’Istruzion cunsieia l minister dl’Istruzion y cumpëida 74 cumëmbri che ie majera pert unì litei da nsenianc y diretëures de scola. Na delegazion de chësc Cunsëi ie tl Südtirol per vijité vel scoles dla trëi grupes de rujeneda y per ancunté diretëures y nsenianc. N mierculdi domesdì, ai 30 de nuvëmber, iel stat n’ancunteda cun i trëi assessëures provinziei Mussner, Kasslatter Mur y Tommasini cumpaniei dai ntendënc.
I assessëures à nuzà chësta ucajion per rengrazie de persona per la valutazion positiva dla ndicazions provinzieles per la reforma dla scola tla provinzia de Bulsan. Da pert dla Provinzia de Bulsan vëniel fat de gran nvestizions per la furmazion y la strutures de furmazion. “Chëstes ie nvestizions per l daunì, nvestizions che juda al bënsté dla cumenanza” à respundù Mario Guglietti, vizepresidënt dl Cunsëi naziunel.
L assessëur ladin à prejentà la particularità dla scoles ladines. “On na scola che ie nasciuda per tò ite trëi rujenedes y che se à svilupà inant nchin a ruvé a nsenië nce nglëisc, franzëus, spanuel o rus. Nosc sistem scolastich ie adatà a nosta situazion spezifica de mendranza tla mendranza, n model che n se lascerà nia cupië, ma da chël che n possa se cialé ju ideies” à dit Florian Mussner udan la scola ladina te n cuntest europeich. L assessëur ladin à nce spiegà che i nsenianc dla scoles ladins muessa mustré su l atestat de trilinguism y che per pité na didatica pluriliguistica ons nce na repartizion ladina tl’Univestità.
Da pert di reprejentanc dl Cunsëi naziunel iel unì valorisà l gran mpëni per la reforma dla scola ulache l ie unì dat pëis a mparé rujenedes y l cunliamënt danter furmazion y furmazion prufesciunela. I ntendënc ala scoles, Verra, Höllrigl y Minei à sorissà la resposta positiva da pert di tecnics dl Minister per la scoles da tlo y per jì inant sun chësta streda.
Argumënt dl’ancunteda cun la delegazion da Roma ie nce stat l’ena scolastica a cin dis, dl’adatamënt dla lege per la scoles prufesciuneles cun la puscibltà de matura y la furmazion di nsenianc che ie unida refurmeda.
Ntan si vijita tl Südtirol à la delegazion dl Cunsëi naziunel ncuei danterauter nce vijità l Istitut Raetia y l Lizeum d’Ert cun scola prufesciunela a Urtijëi.
as
