Atualità
Domandes y cursc de preparaziun al ejam de ladin por insegnanc
USP - Por rové tles gradatöres di insegnanc tles scores y scolines ladines mësson avëi fat n ejam de ladin aposta. Le proscimo ejam por i insegnanc é ai 21 de merz; an po se scrì ite cina ai 21 de forà. I cursc por s'arjigné ca mët man ai 2 de forà.
Por fà l’ejam de ladin por i insegnanć de scora y scolina mësson scrì fora le formular aposta (da ciafè tles direziuns de scora) y le dè jö pro le Departimënt Educaziun y Cultura Ladina a Balsan. L'ejam é metü adöm da na proa scrita y öna a usc. Pro la proa scrita él da fà na traduziun dal talian o dal todësch, aladô de ćiche le candidat s’à chirì fora. A chi che passa chësc ejam por rové sön les gradatöres, ti vëgnel inće reconesciü l’ejam de ladin de livel A dl trilinguism.
En colaboraziun cun l’Istitut Ladin Micurà de Rü vëgnel pité n curs de preparaziun al ejam. A San Martin mëtel man ai 2 de forà, dagnora de jöbia, dales cater ales sis domisdé (ai 2, 9, 16, 23 de forà y al pröm de merz). Le curs por gherdëna vëgn tignì tla sënta dl Istitut Ladin de Sëlva al pröm, ai 2, 9, 15, 23 y 29 de forà, dagnora dales cater ales sis domisdé. Por chisc cursc de preparaziun pon se scrì ite diretamënter tl Istitut Ladin Micurà de Rü (tel 0474- 523110, 0471-794531). Tles direziuns dles scolines, dles scores y tl’Intendënza ladina vëgnel pité le liber “Cultura ladina” por s’arjigné ca al ejam.
as
