Atualità
686 iscrizions tla scolines ladines, deguna lista de aspitanza
USP – Tl proscimo ann de scolina puderà 686 mutans y mutons di luesc ladins jì ala scolina. A chësta maniera ne iel per la 17 scolines dla Val Badia y de Gherdëina chëst iede deguna lista de aspitanza per giapé lerch. Aldò de na lege provinziela ne vëniel nia plu tëut su i plu pitli cun manco de 30 mënsc, sciche l fova unì fat te vel scolina te na fasa sperimentela.
Do che l’iscrizions per l ann de scolina 2012/13 ie finedes via, à i cunsëies dla scolines da permò tëut la dezijion de tanc che possa unì tëuc su. La scolines ladines pieta na luegia per duta la 686 iscrizions. Nce per 6 mëndri che ne ova nia giapà lerch a Runcadic an abinà na soluzion a Sureghes y Urtijëi.
Tenian cont di sculeies sëura 30 mënsc, che à l dërt de jì ala scolina, ie la iscrizions caledes de 6% permez al ann passà, nsci saral d’autonn 44 mutons y mutans de manco che va ala scolina tla valedes ladines. Permez ala mesaria di ultimi cin ani ie la cumpëida de iscrizions te duta la scolines ladines caleda de 35. Chësta reduzion dla cumpëida generela vën a se l dé per via dla variazion dl svilup demografich.
L servisc de scolina per i mëndri da 24 a 30 mënsc ne possa te nosta provinzia nia unì svilupà inant ajache l regulamënt ne vëij nia danora n’autra tle de personal pedagogich. Per via dl pat de stabilità ne possel nia unì cunzedù personal pedagogich sëuraprò per curì chësta esigënza de vel familia. Ti ultimi ani fovel unì lascià pro vel sperimentazion de scolines singules. “Cun l ann de scolina 2012/13 ne uniral a livel provinziel nia plu cunzedù chësta sperimentazions” dij l’ispetëura Edith Ploner, “ma te tramedoi valedes ladines iel strutures privates che tò su mutons y mutans de chësta età”.
Per l ann de scola che vën à l assessëur Florian Mussner bele azetà de mantenì duta la 35 sezions. De cunseguënza ne ie la cumpëida mesana per sezion nia plu tan granda. “Cun manco de 20 mutans y mutons per sezion iel nce mesun pité n miëur servisc de scolina, y chësc fej drët plajëi” sorissea l assessëur provinziel ladin.
La reduzion dla cumpëida generela de iscrizions se lascià dantaldut sentì ti majeri luesc sciche a Urtijëi ulache l sarà 12 sculeies de manco, che fej ora na reduzion de 10%. Te Sëlva ne vëniel nia plu fat la sezion cun i plu pitli , ma l resta mpò cater sezions. Tla Val Badia se lascia la variazion demografica sentì l plu a La Pli ulache d’autonn saral me plu 12 mutans y mutons, che ie feter l mez permez a chëst ann.
A Urtijëi uniral d’autonn inò pità l servisc slungià ntan l domesdì. Families ulache tramedoi genitores muessa lauré à damandà chësc servisc per 23 mëndri. Mpede jì a cësa dala 14.45 puderai resté te scolina nchin la 17.15. “Sce l ie amanca cin dumandes, uniral sëuraprò giaurì la scolina bele da mesa la ot da duman” spiega la diretëura Hannelore Insam.
De duta la iscrizions per l proscimo ann de scola ne n’ iel 40 de imigrei. Chisc ie dantaldut ti majeri zëntri sciche Urtijëi y Al Plan de Mareo. Ntan la sajon da inviern (dezëmber nchin Pasca) ruva per esperienza daniëura n valgun mëndri imigrei mo leprò.
as
