Atualità
Descedé l’interès por i pröms secui de vita dla popolaziun ladina
USP - Tl cheder dla formaziun di direturs dles scores y scolines ladines à l’Intendënza Ladina organisé na vijita al Museum nü Mansio Sebatum a San Laurënz te Puster ai 26 d’aurì.
Le grup di direturs cun l’Intendënt y les Ispeturies é jü a ti ćiarè a chësc Museum realisé dan püć mëisc aladô de n conzet de pedagogia museala interativa. Te na vijita ales escavaziuns archeologiches tla vedla staziun romana y ai resć sön le col de Ćiastel Badia él stè meso da imparè a conësce damì i 4.000 agn de insediamënt tl raiun de San Laurënz, dal tëmp neolitich ćina al dedaincö.
La staziun romana de Sebatum à na importanza particolara por les scores ladines, ajache l’insediamënt tles valades ladines, dantadöt dla Val Badia, à dessigü metü man tl tëmp neolatin da chësta staziun.
Tres chësta vijita déssel ti gnì pité ales scores ladines la motivaziun da vijité nia ma le Museum Mansio Sebatum mo inće les staziuns archeologiches sön i 7 coi incër San Laurënz.
Cun chësta scomenciadia de formaziun à l’Intendënt Ladin orü descedè l’interès dl monn dla scora por i pröms secui de vita dla popolaziun ladina dal tëmp roman ala formaziun dl lingaz y dla popolaziun ladina.
usp
