Atualità
Sculeies dla trëi grupes deberieda de viers dl’Europa
USP - Passa 200 sculeies la scoles autes tudësces, talianes y ladines ie jic deberieda de viers dl’Europa. L se trata de na scumenciadiva sustenida dala repartizion provinziela Afares comuniteres y dala trëi Ntendënzes per mparé a cunëscer miec l spirt europeich y la strutures. N l di dl’Europa, (NCUEI) ai 09 de mei, iel tla scola auta Kunter a Bulsan unì prejentà i resultac dl proiet “Viac a Bruxelles”.
Sculeies de diesc cuarta tlasses dla scoles autes de duta trëi rujenedes se à ancuntà tla scola Kunter a Bulsan. Derberieda cun nsenianc, dirijënc y ntendënc ti an cialà a i cuntenuc che ie unic laurei ora tl proiet. Per l prim iede iel chëst ann unì fat n proiet sun l’Europa cun viac a Bruxelles.
La scumenciadiva ie mueta dala repartizion provinziela Afares comuniteres acioche i jëuni se sënta plu da cësa tla ntegrazion europea. “Nce sce l ie mo truepa dificulteies, ne iel deguna alternativa al’Europa” à dit l diretëur de repartizion Thomas Mathà fajan nce referimënt ala truepa pusciblteies che l’Europa ti gëura ai jëuni.
Cuntenut dl proiet scolastich ie dantaprima stat de lauré su deberieda tematiches di paejes dla Union Europea, si storia y si daunì. La scoles che à fat pea à purtà dant si proiet deberieda cun na scola partner. La scola auta da La Ila à laurà deberieda cun l ITE tudësch de Burnech, l Istitut Raetia de Urtijëi à laurà cun l lizeum tlassich tudësch de Bulsan.
Pra la prejentazion finela iel unì sorissa la culaburazion tl mparé y nce l cuntat danter sculeies de plu grupes de rujeneda. L ntendënt ladin Roland Verra à fat referimënt ala senificat multiculturel dl proiet, nunzian la posizion geografica dl Südtirol che porta pro al’ancunteda dla cultures.
Segonda pert dl proiet ie pona sta n viac de studi a Bruxelles y l materiai per la scoles.
Per n auter ann iel bele udù dant na segonda edizion. Danter la 20 tlasses che puderà fé pea iel resservà la lerch a 4 tlasses de scoles autes ladines.
as
