Atualità
Nuef ejam de ladin per nsenianc
USP – Per nsenië tla scoles y scolines ladines muessa i nsenianc documenté si cumpetënza linguistica tla rujeneda ladina. Pra l ejam de ladin per nsenianc iel unì mudà la pert scrita che ne sarà nia plu na traduzion ma dumandes a resposta davierta.
Sun pruposta dla cumiscion de ejam an ulù dé n majer pëis ala cumpetënza linguistica de chiche ulëssa nsenië, che no de fé traduzions. “L nterpreté n test cun dumandes a resposta davierta se damanda n savëi linguistich scialdi plu aut y la traduzion ie n sistem de ejam che possa nce cumpurté vel problem, sce la ne curespuend nia avisa parola per parola” spiega l ntendënt Roland Verra. Deguna mudazion ne iel unì fat tla prova a usc. L livel de comunicazion per ladin a purté dant cuntenuc vën tlo muserà damandan cuntenuc pedogich-didatics y cultura generela.
La forma nueva dl ejam per nsenianc ie śën plu daujin al sistem de ejam tla rujeneda tudëscia y taliana pra l ejam de bilinguism.
as
