Atualità
Prinzips nueves per l lëur dla Scolines Ladines tl respet dla partezipazion
USP - La 17 scolines ladines à ntan chësc ann laurà ora n prufil pedagogich aldò de chël che possa unì urientà miec l lëur cun y per i pitli mutons y la pitla mutans. Chësc model de urientamënt ie (NCUEI) ai 18 de mei unì purtà dant ai reprejentanc di genitores, ai respunsabli di chemuns y dl sistem furmatif ladin, ma nce a istituzions che lëura deberieda cun la scolines ladines.
Te 35 ani che fova unida metuda su la direzion dla scolines ladines iel stat n gran svilup dl lëur te scolina. Per jì inant cun chësc svilup y per se adaté miec ala cundizions dl tëmp, iel stat de utl lauré ora n model de urientamënt. “Ntan chësc ann ons laurà deberieda sun i prinzips de identificazion aldò de chëi che n se recunësc” à spiegà l’ispetëura Edith Ploner. L lëur ie unì svilupà se stizan sun na cundivijion de valores y de cumpurtamënt tl’atività pedagogica. L fin primer ie che duc chëi che lëura tla scolines, cun la scolines y per la scolines se capësce miesc sun i cuntenuc de chël che i fej y ciuldì che i l fej.
L resultat ie n model de urientamënt cun cin prinzips de lëur. Chisc ie da capì sciche fundamënta de valores che ti dà urientamënt al personal pedagogich y ai respunsabli per la scolina. Nsci vëniel dat gran valor ala cooperazion danter chëi che lëura pea tl pruzes de furmazion. Bele ti prim ani che i pitli zapa ite te chësc sistem de furmazion se tolen a cuer l’identità ladina, cialan de la rafurzé bele tla scolina. Te chësc cuntest vëniel nce dat gran mpurtanza a al nsenië y mparé de plu rujenedes, mantenian la rujeneda ladina sciche fundamënta, vëniel nce giaurì la porta de vieres dl tudësch y talian. Recunescimënt y rafurzamënt dëssel unì segurà al’individualità de uni un, sibe l sculé o chiche lëura tla furmazion. I prinzips dla ncëria dla scolina sciche istituzion de furmazion reverda l viver, l sperimenté y l fé pea. L ie la cundizion de basa per l mparé dla mutans y di mutons te chësta età.
Dut l mpëni ëssa puech valor sce l restëssa me sun papier, perchël an dat gran pëis al aspet dl muvimënt, che simbulisea l adatamënt che dëssa do y do unì fat a mudazions dl tëmp. “Uni ann ulons tò ca i prinzips de lëur y i cialé tres n referimënt ai chemuns, genitores y la mutans y i mutons” à sorissà la diretëura Hannelore Insam.
I prinzips de lëur ne ie nia me na ndicazion, ma i se damanda de unì vissui. Chiche à da n fé cun la scolina, possa dal’autra pert nce se damandé che i vënie tenì ite tl lëur pratich cun la pitla mutans y i pitli mutons. L assessëur Florian Mussner à pra la prejentazion a La Ila valorisà l mpëni de duc chëi che à laurà pea tl proiet cun l fin de l lëur cun mo plu cuscienza per l nosta cumenanza, per nosta families.
L svilup dl proiet dl ann dla scolines ie unì cumpanià dai esperc Siegrid Jamnig y Ernst Windischgraetz de Graz y Viena. I prinzips de lëur che dà urientamënt per duta la Direzion “Ladinia” ie unic laurei ora deberieda cun la la cuordinadëures y i teams dla scolines de Gherdëina y dla Val Badia. Davia che la scolina ie drët nraviseda cun la realtà de cësa, iel nce unì dat pëis ala culaburazion cun la repartizion provinziela per la Cultura Ladina.
Do che dl 2008 fova unida ora la lege nueva de furmazion y pona dl 2009 la ndicazions provinzieles per la scolines ladines, à l team de direzion cun l ispetëura Edith Ploner, la diretëura Hannelore Insam y la vizediretëura Frida Comploj abù la scumenciadiva de adaté y atualisé l model de lëur. Śën che chësc majer lëur ie unì realisà se mbincia la respunsables dla scolina che i prinzips de urientamënt posse viver y lië adum la »cumunità che educhea« renfurzan nsci duta la persones che sëurantol respunsabltà per la sozietà da n duman, lauran ncuei a bën dla pitla mutans y di pitli mutons.
Prinzips de urientamënt per la Scolines Ladines
L'autoriteies à pra la prejentazion a La Ila purtà dant pensieres sun i cin prinzips.
La va mé deberieda
Sun la basa di pensieres de urientamënt che fova bele unì fai iel da tenì cont dla capaziteies y manieres de udëi de uni un. Ma i vares inant ie me mesun arjonjer deberieda. L diretëur de repartizion Alexander Prinoth à metù a cuer la vijion de na majera partezipazion che ie essenziela per svilupé na urganisazion.
Viver tlo – jì ala scolina tlo
L’alfabetisazion che vën te nosta scolines fat te trëi rujenedes ie per l assessëur Florian Mussner n jì de viers dl’Europa. L plurilinguism ie na basa per pudëi dé esprescion de sé nstësc y per ruvé n cuntat cun d’autra cultures. La vita te nosc ncësa à n gran liam cun la natura che nes cundizionea y da chëla che pudon nce mparé. L vester mendranza te nosc raion ie rejon de pudëi avëi autonomia. Nsci iel mesun lauré spezificamënter sun la particularità dla scolina ladina. A livel aministratif iel da pert dl assessëur ladin unì segurà gran mpëni per mantenì la scolina, nce sce la cumpëides ie datrai massa pitles.
Uniuna y uniun de nëus: n mond tl mond
Da una pert adrova la persona n cuntest soziel, dal’autra pert à uni un n valor sciche n cosmos per sé. L ntendënt Roland Verra à rujenà de chisc doi aspec che ie per drët un contra l’auter y che ie scialdi riei da viver dant tl mond dla scolina. Aldò dl ntendënt iel debujën de na gran preparazion pedagogica particulera, de umiltà y respet. L fin ie de arjonjer y madurì n microcosm ndividuel y che n sibe bon de se realisé te n macrocosm universel.
Lerch y tëmp per sperimenté, mparé a cunëscer y fé pea
De doi regules de chësc prinzip à rujenà l digan dl’università Franz Comploi. L uel vester tëmp y lerch per mparé: lerch dedite che fej ora truep dla persunalità. Leprò l tëmp, l ritm ndividuel che se adrova datrai nce na strutura data dant dal’educadëura. La segonda regula reverda l lië adum de chël che n à mparà acioche l nes resta. Aldò dl digan dl’università nes resta puech de chël che on mparà esplicitamënter, ma la majera puscibltà de svilup nes pieta chël che on mparà implicitamënter, zënza cuntrol di educadëures. Chësc nes garata sce son boni de lauré sciche a fé n juech y chësc possa i granc mparé dai pitli dla scolina.
Persones cumpetëntes y autonomes tla vita
La cumpetënzes dla persones cumpetëntes ie stat l pensier zentrel purtà dant dal’ispetëura Edith Ploner. Tl ejëmpl dl levé su do vester tumei vën a lum na cumpetënza che ie madurida do avëi purvà truep iedesc nchin a vester stai boni de sté sun si giames. L’autonomia ie fata de truep vares, aldò dl’ispetëura iel debujën de pudëi crëscer tl autonomia. Chësc garata cun entusiasm, mpëni y prufescionalità. Ajache me sce n crëia te si cumpetënzes vala nce. Y chësc nce canche la ne va nia saurì.
Cëla la fotos sun www.facebook.com/pages/Jonta-dla-Provinzia-de-Bulsan/175038282506579
as
