Scora / Cultura | 24.05.2012 | 15:29

Rumantsch Grischun (1): esperienza de na rujeneda unificheda

USP – Per mparé a cunëscer miec l’esperienza che i ladins-rumatsch à fat te passa 20 ani cun si rujeneda unificheda, se à na delegazion de istituzions ladines ancuntà cun promotëures, l’aministrazion cantonala y reprejentanc locai dla Val Müstair. Cun la vijita ti Grijons à la delegazion (INIER) ai 23 de mei pudù capì miec cie che à funziunà y ciuni che ie stai i majeri fai: dut chësc per pudëi valuté miec la situazion dl Ladin standard per l raion dla Dolomites.

Do avëi audì i pro y contra, à la delegazion recunesciù che nce ti Grijons iel debujën de plu tëmp acioche la ntroduzion de na rujeneda unificheda posse jì na streda plu naturela, trajan pea la jënt cun trasparënza. “Velch de artifiziel metù da lassù jù ne vën nia azetà, la rujeneda muessa unì sentida dala jënt y unì da lajù su” dij l assessëur Florian Mussner. Per la situazion ladina iel aldò dl assessëur debujën de curé miec i cuntac danter i idioms. De chësc viers dëssel unì laurà deberieda a recunëscer paroles nueves. “Tla funzion de vizepresidënt dla region udëi cialé de mëter a jì na grupa danter la valedes ladines che lëura sun neologisms” nscì Florian Mussner.

La Rumantschia possa me te vel pertes unì paredleda ala Ladinia. Feter 40.000 rumantsch se spartësc te cin idioms de valeda. La rujenedes ufizieles ie l grischun, l tudësch y l talian. La defrënza zentrela permez ala Ladina ie che dut l raion dla Rumantschia vën aministreda da na sëula aministrazion, l Chantun Grischun. La jënt che rejona l grischun ie feter n chert de duta la populazion. Davia che la democrazia vën metuda n pratica a na maniera plu svilupeda, ie la situazion iuridica drët defrënta. L vën dat gran pëis ai referendum y i chemuns à la cumpetënza sun la rujeneda tl’aministrazion y scola. La jënt rumantscha ne vif nia duta te luesc defin rumantsch, te vel luesc iel me plu n chert (o mo manco) dla populazion che rejona rumantsch. I raions rumantsch na va nia duc a sëida l un cun l auter.

La ntroduzion dla rujeneda standard ie jita massa debota. L ann 1986 fova l Rumantsch Grischun deventà rujeneda ufiziela tla Conferderaziun (l Stat) y tl Chantun. L referendum dl 2001 sce mantenì l standard tl’aministrazion fova passà me cun na pitla maiuranza. Tlo ova fat pea duta la populazion dl Chantun, te chëla che i rumanc nstësc ie tla mendranza.

Nscì se ova nce giaurì la streda per fé l var te scola. Ma si sistem scolastich ie autramënter permez ala valedes ladines dla Provinzia de Bulsan. Ti luesc tradiziunalmëter rumantsch vëniel nsenià duta la materies per rumatsch. Dl 2003 fovel tl chantun unì tëut la dezijion dé ora i materiai de scola me plu tla rujeneda standard mpede te cin idioms. Chësc dantaprima per na rejon de sparani. I chemuns dla val Müstair fova stai danter i primes a scumencé la ntroduzion dl standard te scola. Te chësc raion vëniel rujenà l idiom Jader, ma scrit tl idiom Vallader. Dlongia l bujën de savëi l tudësch y talian, y te na vijion plu globaliseda nce l nglëisc o l franzëus (la cuarta rujeneda svizra), fovel per la families deventà truep a mparé nce l Rumantsch standard. Chësc ie dantaprima unì sentì canche l ie unì ora n liber de conc per Rumantsch Grischun, cun chël che i genitores se à stentà a ti sté do ai sculeies a cësa. Nscì iela pona ruveda che l referendum dl 11 de merz 2012 tla val Müstair ie jit ora cun 65% per jì de reviers al idiom de valeda te scola. Chësta dezijion ie nce unida tëuta te chindesc d’autri chemuns. De feter 80 chemuns cun scoles rumantsches fova feter doi terzi (2/3) dantarprima restei pra si idiom. Di chemuns piunieres tl adurvé l Rumantsch Grischun te scola ie feter i mec inò jic de reviers a si idiom.

Te vel ciamps, ora de scola, ie l Rumantsch standard nce unì azetà y de chësc ne vëniel nia debatù tla Svizra. Per capì miec la situazion à la delegazion de istituzions ladines abù trëi ancuntedes. (cëla articuli a pert)


La Delegazion de istituzions ladines
Al'ancuntedes à tëut pert l assessëur provinziel Florian Mussner, l diretëur y presidënt dl Isititut Ladin Micurà de Rü Leander Moroder y Albert Videsott, l ntendënt Roland Verra, Paul Videsott dla repartizion ladina dl’università, l diretëur y l culaburadëur dla repartizion provinziela per la Cultura Ladina Alexander Prinoth y Alex Piccolruaz.

Articuli dla trëi ancuntedes plu a puntin:
I promotëures dla Lia Rumantscha

L’aministrazion dl Chantun Grischun

La pratica tla Val Müstair

Nfurmazion sun la Rumantschia y Ladinia nce sun www.filcultural.info
Nfurmazion sun l rumantsch unificà sun www.rumantsch-grischun.ch

as

Galaria dales fotografies

Tl Chantun Grischun iel stat una de trëi ancuntedes sun l rumantsch standard: l assessëur Martin Jäger y l nciarià per rujenedes Ivo Berther cun la delegazion dla istituzions ladines;

Downloads