Scora / Cultura | 26.05.2012 | 09:00

N liber nuef de stories per jëuni, scrit da autores ladins

USP – L liber nuef de stories per jëuni mostra su l bon resultat de doi cuncorsc metui a jì dal Assessorat provinziel ladin: l cuncors de scrì per ladin y chël de grafica per l cuiertl dl liber. Trëi autores ladins y doi artistes de grafica ie (INIER) n vënderdi sëira, ai 25 de mei unic premiei a Urtijëi n ucajion de na sëira leterera cun prejentazion dl liber nuef.

Tl liber nuef iel unì publicà sies stories per jëuni che trata de curaje zevil, dl daunì o dla lidëza. Chësta publicazion ti dà n mpuls jëunn al panorama leterer ladin y juda pro a ti dé na majera richëza ala rujeneda ladina. L suzes dla terza edizion dl cuncors de leteratura se mostra dantaprima tla cumpëida de jëuni che à fat pea. I autores jëuni, danter i 16 y 19 ani ie stai cater iedesc mo n tanc che no chëi plu vedli. De ndut à 53 autores ladins mandà ite si stories per jëuni. “L resultat dl cuncors mostra che l vën do ca na bela tlapeda de jëuni che à legrëza a scrì per ladin. Ëi à dat ejëmpl de co che n possa dé esprescion a sentimënc y ideies te si rujeneda de oma, nce sce l ie na rujeneda de mendranza”, nscì l assessëur Florian Mussner.

L prim pest dl cuncors à pià do Tobia Moroder cun l pez “Testamënt a jënt scunesciuda” y l segondo Ruth Videsott cun “I confins dla liberté”. Tla categuria di jëuni ie me Julia Runggaldier unida premieda cun l segondo pest, ëila à scrit la storia “L pra che ne ie nia”. Ma tl liber „Autëures Ladins Scrij...“ iel mplu nce da liejer la stories “Resté nsci per for” de Elisabeth Kostner, “Al basta daorì i edli” de Simon Kostner y “L tëmp dla vita” de Elena Demetz. 

La stories plublichedes tl liber ie unides crisses ora da na cumiscion metuda adum da Marco Forni, Roberta Dapunt, Isabella Ties, Claus Vittur y Gretl Senoner. Do la valutazion di pec letereres à i 5 esperc sorissà la bona cualità dl’opres mandedes ite. Ntan la sëira tl local di jëuni “Saut” a Urtijëi à i autores dl cuncors liet vel pez ora dl liber.

Da pert dla Provinzia de Bulsan iel unì metù a jì l cuncors cun publicazion dl liber per sustenì n bujën particuler dla mendranza. “Te nosta pitla grupa de rujeneda ne iel nia tan de autores, perchël ons ulù pité ucajion che l vënie scrit pec de leteratura. Te na mendranza ne iel nianca n gran publich per dé ora libri, nscì à la Provinzia nce fat n liber cun i resultac di cuncors” spiega l diretëur de repartizion Alexander Prinoth.

Ntan la sëira leterera iel nce unì premià l’artistes de grafica che à venciù l cuncors per l cuiertl dl liber. Isabell Pitscheider mostra cun si fotografia pei che sënia la streda y che dà l’idea de sëides, de cunfins che ie, ma ne ie nce nia, che n possa spusté o nce mëter da na pert. Ëila à venciù l prim pest de grafica dan a Petra Polli che à fat n’opra astrata cun na nzijion de ram. Per l cuncors de grafica iel unì mandà ite 55 lëures fai da artisć ladins, ma nce dl’autra grupes de rujeneda. Chësc dà esprescion a na dimenscion interculturela de valor per l cuntat cun l’autra grupes de rujeneda.

L liber de stories per jëuni, stampà te 1200 copies, ie da giapé tla Repartizion Cultura Ladina a Bulsan (www.provinzia.bz.it/cultura-ladina).

De plu fotos sun www.facebook.com/pages/Jonta-dla-Provinzia-de-Bulsan/175038282506579

as

Galaria dales fotografies

Trëi autores premiei: Ruth Videsott, Tobia Moroder y Julia Runggaldier cun Alexander Prinoth;