Atualità
Fabian Feichter, reprejentanza ladina tla mostra Panorama
USP - Cater artisc’ reprejenteda la valedes ladines pra la gran mostra de ert nueva “Panorama 4” a Franzensfeste. Aron Demetz y Gerhard Demetz ie ejëmpli di artisć ladins che à bele fat streda. Fabian Feichter y Diego Perathoner ie pert de na generazion jëuna che porta na vëta nueva tla maniera de fé ert ti luesc ladins. Tla sëuravijion dl’ert atuela tl Südtirol iel da ndut da udëi 33 posizions de ert contemporanea. – Na prejentazion de Fabian Feichter.
Fabian Feichter ie n artist etletich che prova ora y se noza di mesuns plu defrënc dl’ert cuntemporana, purvan nsci a arjonjer na reazion tl spetadëur. Positiva o negativa che la sibe.
Truep lëures de Feichter à da nfé cun la evoluzion y la trasfurmazion dla cosses, ma nce cun la poetica dl cuntrast dissonant danter persona y natura y danter vita y mort. Una dla tematiches che Feichter porta dant l plu suvënz ie propi la mort, de chëla che „n rejona for massa puech, ajache la jënt à tëma y la ascuend, nce sce la sà che dant o do ruverala per duc“.
A Franzensfeste prejënta l artist inò chësc argumënt, l ciarian de duta si sfumadures tragiches y auzan ora la naturalëza dl destin, a chël che l ne n’ie nia mesun no ti vester y no ti mucé. Tl ambient claustrofobich crià dal artist se abinerà l spetadëur te n scenar apocalitich; l unirà tucà, nchinamei drusà, da uni sort de stimuli acustics y visifs. Na fossa, mpede vester giaveda tla tiera, se ërj sëura l fonz su, davierta y manacëusa. Sun i parëies dla sala iel da udëi, busienc y ossessifs, i chedri de na proiezion che ie metuda adum da n grum de tòc de films. Feichter auza ora l cumpurtamënt melsann de cër ambienc mediatics y l critichea la prëscia y la superfizialità de na sozietà davierta a cunsumé acriticamënter d’uni sort de pseudo-nfurmazions, vendudes sciche paradigmes assoluc.
L cuntrast danter la fossa, statica y belau nëubla te si vester, y la rëscia psichedelica dla proiezion dà mpaz y manacia de tò adalerch la segurëzes dl vijitadëur. L chiet assolut tla tiera semea, a n cër pont, sciche n mesun per se desgatië da dut cant.
(prejentazion dl curadëur ladin de Panorama, Tobia Moroder)
Fabian Feichter (* 1986) de Al Plan de Mareo. L à fat la Scola Prufesciunela a Burnech y daldò la Scola Prufesciunela de scultura te Sëlva. L viv y lëura a München, ulache l ie scrit ite dal 2006 tl’Academia d’Ert.
Mostres y proiec plu mpurtanc
2012 Rumore, Le Murate, Firenze
2012 Super Ecke, Kunstpavillon, München
2011 Neue Stofflichkeit. Textilkunst durch die Jahrhunderte, Diözesanmuseum, Brixen
2011 Die gleichmäßige Verteilung (Sieger-Installation), Kunstauktionshaus Neumeister, München
2011 Jahresausstellung, Akademie der Bildenden Künste, München
www.flachware.de/fabian-feichter
Panorama 4
nchin ai 30 setëmber 2012
Furtëza a Franzensfeste
merdi 11.00 – 21.00, mierculdi – dumënia 11.00 – 17.00
d’agost nchin la 18.00
www.provinzia.bz.it/panorama
Articul dla mostra Panorama cun video y ntervistes a
www.provinzia.bz.it/usp-ladin/285.asp?aktuelles_action=4&aktuelles_article_id=396645
usp
