Atualità
14 de setëmber: Autonomia dl Südtirol per la grupa ladina
USP – Pra l Di dla Cultura Ladina puderan chëst ann nrescì velch de plu sun l Statut d’Autonomia nuef dal pont de ududa dla grupa de rujeneda ladina. L danmesdì de relazions, mujiga y descuscion unirà tenì n vënderdi 14 de setëmber tl palaz provinziel Widmann a Bulsan.
Tl Tratat de Paris l ann 1946 ne fova la grupa de rujeneda ladina nia unida nunzieda. Permò dl 1972, dan 40 ani ie la mendranza ladina unida recunesciuda ufizialmënter tres l Statut d’Autonomia nuef. Cun la normes tachedes ala costituzion taliana se à per la populazion ladina giaurì dërc y pusciblteies. L Di dla Cultura Ladina purterà lum sun l svilup che ie stat, sun la situazion atuela y sun l daunì dl’Autonomia dla Provinzia de Bulsan da pont de ududa dla grupa de rujeneda ladina.
La ntroduzions fajerà l presidënt dla Provinzia Luis Durnwalder, l assessëur ladin Florian Mussner y l drietëur de repartizion Alexander Prinoth. Dopro puderan audì n referat de Rolf Steininger de coche ie unì a se l dé l Segondo Statut d’Autonomia. Georg Mischi prejenterà la storia di ladins danter l 1919 y 1945, ntan che Franz Complojer purterà dant ucajions y pusciblteies per i ladins tres l Segondo Statut d’Autonomia.
Do na pert musichela puderan audì na ntervista al assessëur ladin Florian Mussner y ala respunsabla di servijes culturei de Persenon Alessandra Scorrano.
L di dla Cultura Ladina, n vënderdi ai 14 de setëmber scumëncia dala 09 danmesdì tl palaz provinziel Widmann (plaza Magnago 1) a Bulsan. Chësc danmesdì culturel ie daviert a duc i nteressei de duta la grupes de rujeneda.
---
I culaburadëures di media ie nviei al Di dla Cultura Ladina y de cunedì i cuntenuc.
as
