Atualità
Trio dl'ëiles de Gherdëina pra l “Avënt ladin”
USP – Pra l cunzert d’Avënt tl Dom de Bulsan sarà chëst ann nce da audì la grupa “Trio dl'ëiles de Gherdëina“ cun Otto Dellago. De ndut cianterà y sunerà ai 14 de dezëmber sies grupes de Gherdëina y dla Val Badia per purté dant la tradizion ladina de cianté l Avënt al publich de Bulsan. La mujiga fajerà pra chësc cunzert da puent danter la grupes de rujeneda.
Monika Kelder Venturini, Claudia Klöcker Moroder y Petra Seifart Delazer cianta bele 14 ani deberieda sota la direzion de Otto Dellago che les cumpanieia cun la chitara. Si spezialità ie la cianties populeres per ladin y tudësch. Davia che la vela de chësta cianties per ladin ne ie nia tan granda, ai nce scrit nstës y lascià scrì vel pez te si rujeneda dl'oma.
La grupa "Trio dl'ëiles de Gherdëina" ie ti ultimi ani unida damandeda plu suvënz pra cunzerc da Nadel. Gran unëur ti à danterauter fat a purté dant si pec pra l cunzerc a St. Peter a. d. Schwarzwald ti ani ani 2006, 2008 y 2010. Sëuraprò a cunzerc tl Südtirol y tl Trentin, à la grupa de Gherdëina nce cianta plu suvënz tl'Austria y tl Deutschland pra ancuntedes de sunadëures, cianté da mont y cianté l'Avënt.
Te chisc ani che Monika, Claudia y Petra cianta deberieda ieles deventedes umans de ndut 10 mutons. "Purempò sons stai boni de fé la proves y jì a cianté ajache on daniëura mantenì la legrëza de purté dant nosta cianties" dij Otto Dellago.
L cunzert d'Avënt metù a jì dal Assessorat provinziel ladin, ie prugramà per l 14 de dezëmber, dala sies da sëira tl Dom de Bulsan.
Avënt ladin a Bulsan: l cunzert y la grupes
as
