Atualità
Cor Col dla Vedla pro l' "Advënt ladin"
USP – Pro le conzert d’Advënt metü a jì dal Assessorat ladin tl Dom da Balsan podaràn inće aldì le cor di ëi Col dla Vedla da Rina. Ai 14 de dezëmber ćiantarà y sonarà sis grups ladins por ti presentè al publich de Balsan la particolarité culturala ladina da ćiantè l’Advënt. Cun le conzert gnaràl inće pité na ocajiun de incuntada danter les cultures.
I 18 ćiantarins dl Cor Col dla Vedla sot la bachëta de Lois Huber ne ćianta nia ma ti trëi lingac provinziai, mo ćinamai ćianties de dlijia por latin. Le grup da Rina s'à tut dant da curé la ćiantia popolara da munt y insciö ài en chësc ann bele metü a jì por le nono iade le ćiantè sön munt da Rina che vëgn metü a jì dal 1988 inant vigni trëi agn.
Le ćiantè de livel à ti 37 agn de storia dl Cor Col dla Vedla albü na importanza particolara. Chësc é inće gnü a espresciun canche le cor di ëi da Rina à ćiantè tla trasmisciun "Rund um den Sella" por le ZDF y por d'atres trasmisciuns dl ARD.
Momënć particolars ti agn passà é stà la finala dl concurs de ćiantia popolara l'ann 1987 a Balsan y l'incuntada di cors dl Schleswig Hohlstein l'ann 1980 a Hamburg. Le presidënt August Gasser po mostrè sö che so cor â metü a jì dl 1979 por le pröm iade le Dé dla ćiantia ladina.
Ai 14 de dezëmber ćiantarà le Cor Col dla Vedla y ćiamò cin d'atri grups pro le conzert d'Advënt tl Dom de Balsan.
I ćantarins dl Cor Col dla Vedla
1. tenor: Heinrich Huber, August Gasser, Raimund Promberger
2. tenor: Iaco Ferdigg, Thomas Huber, Pire Rungger, Ludwig Rungger, Pasquale Promberger
1. bass: Carlo Ferdigg, Rudi Craffonara, Otto Winkler, Hilbert Craffonara
2. bass: Pire Craffonara, Roland Mellauner, Oswald Mellauner, Patrik Clara, Alois Tornaretscher
Dirighënt: Lois Huber
Avënt ladin a Bulsan: l cunzert y la grupes
as
