Atualità
Cuartet de tlarineć de Badia pro l'"Advënt ladin"
USP – I tlarineć dl Cuartet “Badia” presentarà pro le conzert d’Advënt di grups ladins a Balsan l’atmosfera particolara di stromënć a fle. I cater tlarinetisć sonarà ai 14 de dezëmber tl Dom de Balsan deboriada cun ćiamò cin d’atri grups pro n conzert che s’à tut dant da presentè la tradiziun ladina de ćiantè y sonè l’Advënt.
Filippo Palumbo, Raimund Pizzinini, Roman Pizzinini y Fridl Pescoller s'à fat dantadöt n inom tl raiun de lingaz todësch. La majera sodesfaziun, insciö Fridl Pescoller, é bëgn stè da podëi sonè por la trasmisciun dl ZDF "Sonntagskonzert", canche ara é stada da odëi dal vi da Corvara. Dlungia i conzerć por les assoziaziuns turistiches y le 4. Corpo d'Armata, sona i cater tlarinetisć tres indô pro concursc. Insciö ési dl 2000 rovà ćina tla finala dl ÖBV Kammermusikwettbewerb a Salzburg, olache ai à albü suzès tla categoria "E Höchststufe".
Ti 27 agn, da canche Pescoller y Palumbo à metü sö le cuartet, à i cater albü tröc de bi momënć da sonè. Dl 1998 ài albü na majera sodesfaziun canche ai à ciafè la miù valutaziun dl concurs por musiga da ćiamena a Amstätten tl'Austria.
Le sonè cun i tlarineć s'adatëia particolarmënter al tëmp d'Advënt. Insciö à le Cuartet "Badia" dl 1988 y 1990 bele sonè pro le conzert d'Advënt tl Nationaltheater de Minca.
Sön invit dl Assessorat provinzial ladin sonarà i cater tlarinetisć ai 14 de dezëmber dales sis da sëra tl Dom de Bulsan en ocajiun dl conzert di grups ladins.
Avënt ladin a Bulsan: l cunzert y la grupes
as
