Atualità
Cunsultes provinzieles di jëuni lëura deberieda
USP - Per l prim iede te chësta legislatura se à la trëi cunsultes provinzieles de jëuni y jëunes, chëla per la grupa de rujeneda tudëscia, la taliana y la ladina, urtà pra na senteda deberieda. Tema prinzipel fova la dejocupazion junila te Sudtirol.
I cumëmbri dla trëi cunsultes à pudù se fé n cheder sun la situazion tl Sudtirol n con'dla dejocupazion junila y nce se nfurmé, sun cie che ie bele unì nvià via nchinamo per ti vester a chësc fenomenn. Partner tla descuscion fova Rolanda Tschugguel dl ufize provinziel per l urientamënt scolastich y prufesciunel, Michael Mayr dl Ufize provinziel servisc dl lëur, Stefan Luther dl Ufize Provinziel per l'usservazion dl marcià dl lëur y Werner Pramstrahler dl Istitut promozion dl lëur.
Te n cërtl de descuscion y nce te pitla grupes de lëur an pudù cunstaté che la dejocupazion junila ne ie te Sudtirol nia tan problematica sciche te autri paejes dl sud dl'Europa, ma che la ie sentida a na maniera defrënta da jëuni y jëunes dla trëi grupes de rujeneda, y nce aldò dla situazion geografica.
La mpurtanza dla cunescënza dla rujenedes per avëi plu puscibelteies sun l marcià dl lëur vën udù for plu de mpurtanza da duc i partezipanc y duta la partezipantes. Per miuré la cunescënza dla rujenedes vala de bujën de flessibeltà tla furmazion y deplù puscibelteies per adurvé nce ora de scola la rujenedes.
N problem bëndebò atuel ie chël di cuntrac de lëur melsegures, che fej plu ria la programazion dl daunì. Nce l fat, che l vën pertendù for deplù dai jëuni y la jëunes, vën criticà. Nia duc y dutes ne ie boni/bones de ti vester al druch che vën da la scola, dai genitores y dal mond dl lëur.
Nteressant ie nce, che i datëures de lëur da for majera mpurtanza a chël che vën tlamà „softskills", che fossa la cumpetënzes sozieles y capaziteies de dezijion y de mené grupes. N possa dantaldut les mparé tres l ulentariat te de uni sort de urganisazions. Jëuni y jëunes se aspieta che tl daunì giaten n miëur recunescimënt formel de chëstes tres la scola.
Pra l'ancunteda iel unì dit che la va de bujën de n post, ulache l ie mesun giaté la miëur nfurmazion puscibla sun la sortes de cuntrac de lëur. Bon fossel nce che persones jëunes che ie tl lëur de se njinië ca a mëter su n lëur autonom giate cunsulënza aldò.
La persones che à tëut pert a l'ancunteda se à fat marueia dla varietà di cuntenuc de chësc argumënt y de si implicazions sozieles. D'ansciuda dl ann che vën uel la trëi cunsultes inò se urté per lauré inant sun la prupostes y la ideies unides ora.
usp
Galaria dales fotografies
