Atualità
Vecchia Romagna vënc l cuncors de scultures de dlacia per sculeies
USP – Tl zënter de Urtijëi à sculeies dl Lizeum d’ert cun Scola prufesciunela „Cademia“ ntan duta l’ena laurà per n cuncors de scultures de dlacia. Danter la cin bozes che ie unides zipledes te na mesura 10 iedesc mo ntan granda, à (NCUEI) ai 18 de jené, venciù la scultura “Vecchia Romagna”. L cuncors metù a jì te na culaburazion cun la Lia turistica y l Chemun à pità lezions de scola particuleres ai sculeies y na bela atrazion turistica per l luech.
Ala fin de n’ena de lëur ala lergia à Marija Markovic y Felix Vougny pudù se tò pea na sperienza mpurtanta per si atività artistica. Sëuraprò ai cun si scultura de na boza de Vecchia Romagna mo pudù pië do l prim pest de 500 euro.
Sciche segonda plu bela scultura de dlacia ie unida valuteda la boza de ega de vita/Weingeist, fata da Valentin Alber, Mattia Demetz, Thomas Delazer y Luca Visciani. Chësta scultura ie unida fata sun la pitla plaza S.Antone, dlongia chëla dla boza de Chanel. La boza dal profem de Sophie Eymond y Andreas Oberberger à giapà l terzo pest. Ntan la premiazion iel de ndut unì sëurandat pesć per 1000 euro.
Cun l aiut di nsenianc Andreas Tomasini y Markus Delago, y l sustëni de Andreas Holzknecht, iel de ndut unì fat cin scultures de dlacia che mesura nchin a trëi metri de autëza. Franziska Rainalter y Loic De Lesmadec à fat na boza de Chianti, ntan che David Harding y Francesco Sacchi à cris ora de fé na carafa dal'ega.
„Per i sculeies iel de gran mpurtanza a pudëi mparé a ziplé nce te d’autri materiai sciche la nëif y la dlacia“ spiega la diretëura dl Lizeum y scola prufescionela Elisabeth Baur. L cuncors à sëuraprò nce pità ucajion de fé scultures de mesures sëuranatureles y chësc te na luegia publica dan ai uedli de truep spetadëures.
Dedite tla bozes de dlacia iel unì metù na lum da culëur che ti dà ntan l’ëures de scur, na cialé ora particuler ala scultures de dlacia y n atmosfera artistica al raion da jì a pe de Urtijëi.
L suzes dla scultures de dlacia tl zënter de Urtijëi à dat rejon a na culaburazion danter scola, turism y chemun. „Chësc cuncors demostra che sce son boni de mëter a jì siniergies danter la istituzions iel mesun crië ucajions particuleres che possa valorisé nosta scoles per l’ert y la tradizion dla scultura de Gherdëina“ sorissea l assessëur ala scoles ladines Florian Mussner.
De plu fotos sun la plata facebook "Jonta proviniziela"
as
