Atualità
Gran dumanda de sustëni ala Provinzia per ativiteies cultureles ladines (cun audio)
USP – La Cunsulta culturela ladina à (INIER) ai 21 de fauré tratà 111 dumandes de sustëni provinziel per la Cultura Ladina, dajan l bënsté a cuntribuc provinziei per na soma de 346.600 euro. L assessëur ladin Florian Mussner recunësc te chësta gran cumpëida de dumandes na gran atività culturela da pert dla lies tla valedes ladines.
Per ativiteies tl ciamp dla Cultura Ladina iel chëst ann unì mandà ite 83 dumandes. Chësc ie feter la medema cumpëida sciche l ann passà. La Cunsulta provinziela per la Cultura Ladina à te si prima senteda da chëst ann bele azetà 69 dumandes. Deberieda cun la dumandes de vel artist, à la Cunsulta dat si bënsté a cuntribuc provinziei per na soma de 300.100 euro.
Ntan i ultimi ani ie la cumpëida de dumandes per ativiteies cultureles ladines daniëura cresciuda. "La truepa dumandes ie na demustrazion de n gran mpëni da pert dla populazion per la cultura ladina. Te nosc luesc ladins iel truepa persones che se da ca per pité atività culturela ala cumenanza" sorissea l assessëur Florian Mussner.
Scebën che la dumandes per nvestizions possa mo unì mandedes ite ntan dut l ann, nen à la Cunsulta ladina bele azetà 12 per na soma de 44.500 euro.
Danter dumandes per ativiteies, artisć, nvestizions y istituzions tl ciamp dla Cultura Ladina nen iel de ndut unì azetà 85 dajan nsci l bënsté a cuntribuc provinziei per na soma de 346.600 euro.
Permez al ann passà iel chëst ann 3,5 percënt de manco scioldi a desposizion per sustenì la Cultura Ladina. Tla spartizion di cuntribuc provinziel vëniel dat priorità al'ativiteies. Chël uel di che n cëla de mantenì i cuntribuc unfat granc fajan me de mëndra mudazions. La defrënza de scioldi a desposizion unirà dantaprima curida scurtan i cuntribuc per nvestizions.
"La for majera cumpëida de dumandes ie da una pert demustrazion de mpëni per la Cultura Ladina, ma dal'autra pert ne dëssel nia vester nscila che la lies damanda n sustëni ala Provinzia ajache les giata for de manco dai chemuns" spiega l assessëur provinziel ladin.
La Cunsulta culturela ladina à spënt 21 dumandes ala proscima senteda, davia che l mancia mo nfurmazions y stlarimënc. Me cin dumandes ne ie nia unides azetedes. L se tratova tlo de ativiteies nia cultureles y de cunzerc de carater cumerziel che ne possa nia unì sustenì tres i capituli provinziei per la Cultura Ladina.
Pernan che l Ufize provinziel per la Cultura Ladina arà giapà la documentazion di custimënc da pert dla lies, puderal cun decret dl assessëur provinziel ladin unì paià ora chësta prima pert di cuntribuc dai pro dala Cunsulta culturela ladina.
as
Galaria dales fotografies
Assessëur Mussner n cont di prim cuntibuc per la Cultura Ladina da chëst ann
- Scarica il file audio 917 kb
