Atualità
L´internet y sü prighi: La polizia postala y la ZCE aconsiëia prudënza
USP – Trapolades pro na cumpra sön internet, le cyber-bullying, le stalking online y la presënza y defujiun de material pornografich – chisc é n valgügn prighi che an po incuntè canche an navighëia sön internet. Tratan na incuntada, organisada da püch dal´Ofize provinzial por mediums audiovisuai adöm ala Zentrala di Consumadus Europeica (ZCE) él gnü dè informaziuns y consëis sön chësta tematica
„I prighi che an po incuntè sön internet n`é nia da sotvaluté, al se trata pö en pert inće de reać cuntra la lege", dij Francesco Campisi, colaboradù dla polizia postala de Balsan y reladù tratan la incuntada. So consëi é chël da ester plü prudënć pro cumpres online, mo inće pro intimaziuns da fà paiamënć sön internet y tla comunicaziun sön i mediums soziai. Inće sce les formes de comunicaziun nöies sön internet porta n gröm de vantaji, él impò da mëte averda, deache „l´internet po inće ester n post d´incuntada cun porsones criminales", spliga Campisi.
Dantadöt les generaziuns plü jones é esponüdes ai prighi sciöche le cyber-bulling, cyber-mobbing y cyber-stalking: fenomenns, olache jogn y jones vëgn porseghità tres l´internet. Por ći che reverda la defujiun de material pornografich cun la presënza de mituns y mitans vëgnel aconsié da tó mosorës de precauziun sciöche le control preventif dles informaziuns che röia online, „n gran laûr de spligaziun vëgn fat de chësc vers dala polizia tles scores te döt le Südtirol", spliga Campisi. So consëi é chël de mëte dër averda y de ponsè do denant che an mët fotografies o informaziuns sensibles online.
Por vigni sort de informaziuns y sospeć pon to sö contat diretamënter cun la polizia postala (numer de telefonn: 0471 531413; misciun email: poltel.bz@poliziadistato.it)
Por de plü informaziuns pon inće telefonè ala Zentrala di Consumadus Europeica (ZCE) al numer de telefonn 0471 / 980939. Sot a chësc numer pon ciafè dantadöt informaziuns y consëis por ći che reverda intimaziuns da fà paiamënć online, plates internet cun sorvisc a paiamënt, e-mails y noeles cun impormetüdes de de gragn davagns.
rc
