Atualità
Incuntada dla seziun scolastica ladina – Mussner: “La promoziun dl plurilinguism é importanta”
USP - Le Consëi scolastich provinzial n'à degöna potesté legislativa, mo al pò dè jö arać y les trëi seziuns (chëra todëscia, taliana y ladina) s´à incuntè en lönesc, ai 12 de mà, por le plenum tla sënta dl Consëi provinzial a Balsan. Chësta ocajiun à anuzè la seziun ladina por na incuntada adöm al assessur ladin Florian Mussner y al’intendënt dles scores ladines Roland Verra. Debatü el gnü danter l´ater l´aprovaziun dl'ann scolastich fat foradecà.
Öna dles tematiches plü importantes dla incuntada é stada l´aprovaziun dl'ann scolastich fat foradecà tratan la scora alta. Por podëi valorisé les esperiënzes che i studënć y les studëntes dles scores altes fej foradecà él gnü debatü sön la manira de azetaziun di ejams y dles proes canche ai röia indô zeruch y dles integraziuns nezesciares por podëi passè ala proscima tlassa. Important de chësc vers é por Florian Mussner, assessur por la scora ladina, dandaldöt che al vëgn garantì la preparaziun formativa di studënć y dles studëntes tratan sò ann foradecà: "Por podëi passè al proscimo ann scolastich él important che i studënć y les studëntes desmostres de avëi arjunt tratan le stüde foradecà les conoscënzes formatives nezesciares por passè al proscimo ann scolastich". Por l´assessur ladin é n esperiënza foradecà importanta por imparè a conësce n lingaz nü y na sozietè nöia tres che l´oferta formativa vëgnes garantida. Por la scora ladina é "la promoziun dl plurilinguism dër importanta y nosta intenziun é de jì te chësta direziun, inće cun n'oferta formativa plü ampla tles scores ladines", spliga Mussner.
Tratan la sentada él inće gnü tratè la regolamentaziun dles graduatories provinziales por insegnanć y la nezescité de n ampliamënt dla scora a Urtijëi. Na tematica debatüda é inće stada l´oferta formativa por i geniturs. Te chësc contest él danter l´ater inće gnü debatü dla conoscënza dla oferta formativa dles scores da pert de geniturs migranc, che gonot n´é conësc nia deplëgn le sistem scolastich ladin y dl Südtirol.
rc
