Atualità
„Migraziun y lingaz“ : Incuntada internazionala de n forum d’esperć a Fribourg
USP - Deplü esperć dai Paîsc Todësch, dal’Austria, da Südtirol y dala Svizera s’à incuntè da püch por s’ajornè sön i svilups atuai tl setur dla migraziun y dla scora te döta l’Europa, inće pro ći che reverda les desfarënzies danter i cater paîsc. L’ incuntada é stada a Fribourg tla Svizera y por l`Ofize provinzial scolastich dl Südtirol à tut pert Sonja Logiudice.
La tematica zentrala dl'incuntada é stada „Prüfen und Testen - als Fördern verkauft" y che trata la relaziun danter la conoscënza di lingać europeichs y le dërt da podëi stè te Europa sciöche migrant. La ghiranza tres plü pretenziosa da messëi conësce tres miù le lingaz dl Stat ospitant à sciöche conseguënza che i tesć linguistics devënta tres plü rîs y che les regolamentaziuns por le prozés d'integraziun devënta tres plü detalié.
Tratan la incuntada él inće gnü studié plü avisa le proiet svizer FIDE che vëgn adorè al momënt sciöche n sistem de formaziun alternativ por migranć. L'idea dl proiet é chëra de porvè da individué deplü i debojëgns dles singoles porsones por ćiafè fora insciö les competënzes comunicatives plü adorades dai migranć y dales migrantes. La inovaziun dl proiet FIDE é che al se desferenziëia dales formes istituzionales di tesć linguistics por migranć y migrantes che l`Uniun Europeica adora ćina sëgn y che al prô da ti dè deplü importanza ales carateristiches personales di migranć y dles migrantes.
Ala fin dla incuntada él gnü presentè inće en referat dla Universitè de Duisburg-Essen sön la tematica dl pluri-linguism, che tratâ la presënza de deplü lingać tl medemo tëmp tla comunicaziun de istituziuns publiches.
rc
