Atualità
Premiaziun dl concurs scolastich „Cangur dla matematica“ incö a Balsan
USP - „La formaziun é la fondamënta por le suzés” – con chëstes parores à Arno Komatscher, Presidënt dla Provinzia, fat les mius aodanzes ai mituns y ales mitans che s’à plazè ti pröms posć pro le concurs internazional „Cangur dla matematica“, olache indöt 6520 mituns y mitans da döt Südtirol à fat para.
N gröm de scolars y scolares, de maestri y maestres, de direturs y direturies de scores, de geniturs y de neni s'à incuntè incö por la premiaziun dl concurs "Cangur dla matematica" tl Palaz Widmann a Balsan, che é inće la sënta dl Presidënt dla Junta, Arno Kompatscher. Insciö él stè propi le Presidënt dla Junta che à fat na sorpresa ai presënć tulon pert ala premiaziun personalmënter, zënza avëi confermè la süa presënza denant. Le Presidënt dla Junta, che ti à inće fat les mius aodanzes ai scolars y les scolares che à davagnè, à sotligné tratan la premiaziun che l'educaziun scolastica de düć i mituns y de dötes les mitans ti stà dër a cör.
Al concurs internazional de matematica al fat para 3.644 scolars y 2.876 scolares, che, cumpëdà adöm, fej indöt 6.520 partezipanć. Le concurs è gnü organisè chësc ann le 20 de merz dl 2014. I mius cinch de vigni categoria é gnüs premià incö a Balsan da Peter Höllrigl, intendënt provinzial por la scora todëscia.
Le concurs "Cangur dla matematica" é pié ia tl 1978 tl'Australia y é spo rové tla Francia tl 1991. Intratan él indöt 6 miliuns de scolars y scolares che fej para sura döt le monn. La partezipaziun al concurs é organisada dala provinzia adöm al Departimënt por la scora di Paîsc Todësc y a n comitê organizatif dal'Austria.
rc
Galaria dales fotografies
