Atualità
Suralüsc tles ploanies por portè inant le proiet de cataloghisaziun
USP - Por podëi se fà n cheder dla situaziun mo inće por portè inant le proiet por na cataloghisaziun de dötes les racoiüdes di libri tles calonies tres le proiet EHB à n grup de esperć formè da Bruno Klammer, Giovanni Mischì, Toni Sotriffe y dai funzionars provinziai Alexander Prinoth y Alexander Piccolruaz vijité da püch les biblioteches dles calonies da Urtijëi, Santa Crestina, Bula y La Pli.
"Les calonies dla Val Badia y de Gherdëna é plënes de operes leterares de gran valüta. Les biblioteches é insciö n tesur d'ert y à na valüta inestimabla por ći che reverda la storia de nosta jënt. La cataloghisaziun de chëstes operes é importanta por le mantignimënt di libri por le dagnì y por podëi inće garantì l'azessibilité por l'archirida. Insciö unse inće la poscibilité da jì zoruch tl tëmp por descurì da plü daimprò nosta identité ladina", dij l'assessur por la scora y cultura ladina Florian Mussner. L'inserimënt dles operes leterares te na banca dać online é important por savëi dl'esistënza di libri tles calonies, al n'é preodü te degun momënt le spostamënt di libri che resta insciö tres tles calonies, insciö Mussner.
Deache le mantignimënt y la cataloghisaziun di libri é n proiet che porta inće cun sè n gröm de cosć n'él les calonies nia bunes da podëi sostignì chëstes spëises zënza n sostëgn da pert dla provinzia. Tratan i suralüsc tles ploanies de Urtijëi, St. Cristina, Bula y La Pli da pert dl grup di esperć formada da Bruno Klammer, Giovanni Mischì, Toni Sotriffe y dai funzionars provinziai Alexander Prinoth y Alexander Piccolruaz podü odëi che na gran pert dles operes leterares n'é nia ćiamò racoiüdes do n ordinn, zënza n inventar y che ne po insciö nia gnì anuzades da n publich plü ampl. "L'Ofize provinzial por la cultura ladina à insciö portè inant le proiet dla cataloghisaziun tres la cooperaziun cun le proiet EHB ("Erschließung Historicher Buchbestände und Bibliotheken in Südtriol": Azès ales racoiüdes de libri y ales biblioteches tl Südtirol) sot ala direziun de Bruno Klammer por porvè da ciafè na soluziun por les calonies interessades", spliga Florian Mussner. Tres le proiet EHB él bele gnü inserì tla banca dać online dla EHB dötes les operes presëntes tla biblioteca dla calonia de Badia y a n bun punt é inće l'inserimënt de düć i libri dla biblioteca dla calonia de La Pli.
rc
