Atualità
L’ann scolastich é rové: Odlada zoruch da pert di trëi assessurs
USP - „La scora é rovada!“ Cun indoman, vëndres ai 14 de jügn se röia por la maiù pert di scolars dles scores elementares, mesanes, altes y dles scores por les profesciuns l’ann scolastich. Inće por i mituns dles scolines pëia ia dai 14 de jügn inant les vacanzes da d’isté. Por la fin dl ann de scora ti aôda insciö i trëi assessurs por la scora Mussner, Achammer y Tommasini a düć döt le bun.
I assessurs por la scora Florian Mussner, Philipp Achammer y Christian Tommasini oress anuzé chësta ocajiun por rengrazié düć i mituns, scolars, maestri, direturs y colaboradus dles scolines y dles scores te döt le Südtirol por le gran impëgn mostrè da dötes les perts y la buna colaboraziun.
Tles scores ladines röia indoman indöt 684 mituns tles scolines, 1265 mituns tles scores elementares, 796 mituns tles scores mesanes y 499 tles scores altes ofizialmënter l'ann de scora. Por la scora ladina é stades les ativitês tl ćiamp dl plurilinguism öna dles tematiches zentrales tratan l'ann. "Le renforzamënt dl plurilinguism é gnü porté inant tres tl conzet de na didatica basada sön de plü lingac y le sistem paritetich é chilò na buna basa por le todësch y talian olache i orun integrè ćiamò deplü l'inglesc, che vëgn tres plü important por le dagnì", dij l'assessur Florian Mussner. L`integraziun dl insegnamënt por l'inglesc y le renforzamënt dles conescënzes tl lingaz ladin é danter l'ater döes prioritês por le dagnì. Insciö él inće preodü n anuzamënt dl lingaz inglesc y dl ladin tratan l'insegnamënt de materies desvalies.
De plü proieć é gnüs inće realisà por ći che reverda l'educaziun linguistica ladina en colaboraziun cun la Repartiziun ladina dla Facolté de Sciënzes dla Formaziun a Porsenù. Por l'intendënt por la scora ladina, Roland Verra, à danter l'ater la colaboraziun dles scores cun l'Université portè de bugn früć: "I ùn porvè da costruì n raport plü strënt danter les scores y la Repartiziun ladina, danter l'ater inće cun ores de leziun di professurs y colaboradus universitars tles scores." De gran valur é chilò inće la realisaziun de material didatich por ladin da pert dl ofize Inovaziun y consulënza dl Departimënt Educaziun y Cultura Ladina.
Por indöt 46.000 scolars tles scores todësces él indoman inće rové la scora, sciöche inće por i 16.250 scolars tles scores de musiga. L'assessur por la scora todëscia Philipp Achammer à incunté tratan l'ann de scora te indöt diesc incuntades te döt le raiun dl Südtirol na gran pert dles porsones che laôra tl ćiamp scolastich. "La scora mëss gnì ponsada deboriada y ma cun les scomenciadies y la motivaziun de vignun é inće le suzès tl'educaziun garanti", insciö Achammer.
Inće por ći che reverda la scora taliana él gnü portè inant n gröm de proieć y scomenciadies tratan l'ann che é oramai passè. Por l'assessur por la scora taliana Christian Tommasini él important sides da arjignè ca i scolars a n monn tres plü globalisé che inće da ne desmentié nia tl medemo tëmp les raîsc locales: "I messun ćiarè da anuzé la gran varieté dles competënzes linguistiches y culturales che i ùn te döt le Südtirol."
A düć chi che à rové cun indoman la scora ti aôda Achammer, Tommasini y Mussner de beles vacanzes y a chi che al ti aspeta ćiamò i ejams finai dla scora mesana y dla scora alta döt le bun.
rc
