Atualità
5 de messè: Convëgn europeich y vijita al BBT – Co s’acredité
En sabeda, ai 5 de messè, s’incuntarà le presidënt dla Provinzia Arno Kompatscher cun i scefs de govern Matteo Renzi y Werner Faymann, sön Ćiastel Prösels a Fié por jì do ala discusciun sön le significat atual dles regiuns tl'Europa. Dedô él preodü na vijita al cantier dl tunel de basa dl Prener – BBT a Mauls (Mules). Düć i media che ô to pert é perià da se acredité ćina en jöbia, 3 de messè.
Öna dles ghiranzes dles trëi provinzies dl Südtirol, dl Trentin y dl Bundesland Tirol é l’anuzamënt dl gran potenzial de colaboraziun interregionala tl raiun dla Euregio. Te chësc contest organisëia la provinzia de Balsan adöm cun le Südtiroler Bildungszentrum y les Universitês de Desproch, Balsan y Trënt n convëgn en sabeda, ai 5 de messé cun autoritês politiches de livel alt sciöche i scefs de govern Matteo Renzi y Werner Faymann, le vizepresidënt dl Parlamënt europeich, Othmar Karas, mëmbri de govern Mara Carmela Lanzetta y Graziano Delrio sciöche inće i trëi presidënć provinziai Arno Kompatscher, Ugo Rossi y Günther Platter. I presënć ti jarà do ala domanda sce l’Uniun Europeica y sü Stać mëmbri tol pordërt en conscideraziun sües regiuns y sce na revalorisaziun dles regiuns ne renforzass nia le proiet d’integraziun europeich.
Le convëgn „Regiuns tl'Europa – Europa dles Regiuns“ metarà man ai 4 de jügn cun na pert scientifica portada dant dala junta provinziala de Balsan adöm cun le Südtiroler Bildungszentrum. Tartan le convëgn portarà dant professurs dles universitês de Desproch, Trënt y Balsan y reladus da Bonn y Minca sües oservaziuns sön la relaziun dles regiuns cun i stać mëmbri y cun l’UE. La pert dl convëgn cun i referać, i intervënć da pert dles autoritês politiches y la discusciun generala gnarà tignida
en sabeda, ai 5 de messé
dales 9 ales 14
sön Ćiastel Prösels
a Fié.
Do le convëgn él sön le program na vijita al cantier dl tunel de basa dl Prener. L’incuntada cun i media sarà al stand d’informaziun dl BBT dlungia la staziun dla ferata a Franzensfeste dales 14 domisdé. Dailò gnaràl organisé la registraziun di jornalisć, fotografs y operadus televisifs che jarà para tratan la vijita. Al gnarà partì fora le guant nezesciar da se vistì tratan la vijita. Dedô gnarà i jornalisć portà cun le bus dl BBT al’entrada dl cantier dl tunel a Mauls. L’azès al cantier é ma poscibl cun i mesi de trasport dl BBT y é proibì a pé o cun n veicul privat. Por motifs d’organisaziun vëgnel ma azetè 3 rapresentanć por vigni medium de informaziun.
Düć i jornalisć y fotografs che ô to pert al convëgn y/o ala vijita dl cantier dl BBT é perià da se acredité ćina en jöbia, ai 3 de jügn (ćina les 12). Por s’acredité val debojëgn da scrì na e-mail a landeshauptmann@provinz.bz.it cun l’inom dl jornalist, fotograf o operadù televisif y dl meso d’informaziun y avisa a ći evënć che an ô to pert (convëgn y/o la vijita)
Informaziuns importantes por i rapresentanć dles televijiuns:
Le convëgn cun Renzi y Faymann gnarà tignì tl salf di ćiavaliers dl Ćiastel Prösels y trasmetü dala RAI en direta. Por gaujia dla pücia lerch él ma gnü conzedü ala RAI l'autorisaziun da filmé diretamënter dal salf. La Rai metarà a desposiziun le segnal audio y/o visual a düć chi che le damana do. Jornalisć y fotografs podarà to pert al convëgn diretamënter dal salf di ćiavaliers.
rc
