Atualità
L’analfabetism ne pò nia plü ester n tema scutè ia
USP - "Nix lesen, nix schreiben, nix gut" – chësc é le titul dl liber nü apëna gnü fora y che é dediché ala alfabetisaziun di migranć. Le liber cunta l’alfabetisaziun nia ma sciöche prozès linguistich y didatich mo inće sciöche poscibilité por tó pert ala vita soziala.
Le liber "Nix lesen, nix schreiben, nix gut", publiché dal Ofize Formaziun Permanënta dl Departimënt Cultura todëscia adöm cun l'organisaziun "Alpha Beta -Piccadilly", contëgn insciö de plü esperiënzes de professurs y personal didatich tratan l’educaziun linguistica dl’alfabetisaziun. Por podëi s'integrè te na sozieté foresta él important da studié le lingaz dl paîsc ospitant. Chi che se stënta da lì y da scrì à inće de manco poscibilitês por podëi s’integrè. Impormò cun l’alfabetisaziun à i migranć na basa por podëi svilupé la propria identité.
La gran sfidada te chësc vers é la capazité da ester bugn da baié sö i migranć da anuzé la poscibilité che vëgn pitada tres i cursc de alfabetisaziun. L’assessur por l’integraziun y cultura Philipp Achammer lalda la scomenciadia di cursc de alfabetisaziun, che é gnüs orgnisà por le pröm iade dan da 12 agn do na inrescida sön i debojëgns linguistics dles porsones migrantes. Por Hubert Bertoluzza, diretur dl Ofize Formaziun Permanënta é i cursc stà ćina sëgn n suzès, inće deache al à fat para plü de 1.000 porsones.
“L’integraziun linguistica mëss ćiamò gnì sostinida deplü y te chësc vers podessun inće s’imaginé n oferta plü regolamentada”, spliga l’assessur Achammer. Por amplié inće i canai de informaziun val debojëgn che les organisaziuns publiches y privates sciöche la Caritas laores adöm y che inće le setur economich dëides para, te tëmps olache an mëss sparagné y i scioldi vëgn demanco, insciö Achammer. Tla discusciun do la presentaziun ê la tematica zentrala dandaldöt chëra de ciafè i canai plü dërć por arjunjé les porsones y co les sensibilisé por tó pert ai cursc de alfabetisaziun.
rc
