Atualità
Scores profescionales: Tres ti dè n’odlada al’economia y al marćé dl laûr
Le raport dl’oferta formativa dles scores profescionales cun l’economia y le marćé dl laûr, les poscibilitês por na promoziun individuala tres i zëntri de formaziun y la formaziun di lerneri: chëstes é stades les tematiches tratades da püch tratan na incuntada danter l’assessur por la formaziun Philipp Achammer y i rapresentanć di zëntri dla formaziun profescionala.
„La formaziun profescionala é n arichimënt dl cheder dles poscibilitês de formaziun te döt le Südtirol” à splighé l’assessur por la formaziun Philipp Achammer tratan l’incuntada, “ara à inće desmostrè da avëi de bunes conseguënzes sön le marćé dl laûr südtirolesc“. Insciö é les scores profescionales n’ocajiun y n meso de acompagnamënt important por i jogn tratan so percurs de formaziun, à sotrissé l’assessur Achammer che à inće dit, che porchël él important che al vëgnes garantì tl dagnì n barat de informaziuns danter le Departimënt Promoziun dl stüde y i rapresentanć di zëntri de formaziun profescionala.
Tratan l’incuntada cun i direturs él gnü tratè de plü tematiches: da öna na pert él gnü baié dla cooperaziun danter la formaziun profescionala cun l’economia y le marće dl laûr. L’assessur y i direturs dles scores ê a öna, che al é fondamental, che l’oferta dla formaziun profescionala mess gnì adatada al marćé dl laûr y che al va insciö debojëgn da ester tres informà sön les tendënzes atuales dl monn dl laûr por nia pité “cursc de formaziun dalunc dala realtè”. Por l’assessur é insciö la colaboraziun cun les organisaziuns economiches a livel di raiuns provinziai de gran importanza.
Implü él inće gnü debatü sön les poscibilitês de mioramënt por ći che reverda l’oferta formativa por lerneri. “Nos ùn preodü da intensifiché i contać cun i ministers a Roma por ćiarè da portè inant nostes mudaziuns al sistem”, insciö Achammer.
Inultima àn inće anuzé l’ocajiun por tratè la chestiun dla varieté dles scores profescionales y les nezescitês desvalies de promoziun. I rapresentanć di zëntri de formaziun profescionala y l’assessur ê a öna, che i jogn dess gnì acompagnà sön so percurs de formaziun dales families, dales organisaziuns de formaziun y de jonëza inće por podëi intergnì te momënć eventuai de bojëgn.
rc
