Atualità
Dala Junta: 35 miliuns por l’assistënza scolastica
Indöt 35,2 miliuns de euro mët la provinzia a desposiziun por stipendiums por la scora d’oblianza, por libri scolastics, la mensa scolastica y por le transport scolastich. Chësta dezijiun é gnüda tuta incö, mertesc al 1. de messè, dala Junta provinziala. Implü é inće gnüda aprovada la proposta dl assessur Achammer por l’ecuiparaziun di diploms de maester artejan danter le Südtirol y l’Austria.
I investimënć dla provinzia por l’assistënza scolastica por le proscimo ann de scora é danter l’ater: 7,8 miliuns por stipendiums por la scora d’oblianza, 3,6 miliuns por libri scolastics, 6,6 miliuns de euro por la gestiun de istituć d’educaziun y 11,3 miliuns por le trasport scolastich. “Ma le transport scolastich à na spëisa anuala de 11 miliuns de euro, chël fej fora 2.200 euro por vigni scolar, na gran spëisa, mo che garantësc l’avalinaza de oportunitês danter i scolars che vir ti zëntri y chi che vir dalunc dala scora”, insciö le Presidënt Arno Kompatscher.
La Junta à inće aprovè incö la proposta por ći che reverda l’ecuiparaziun di diploms de maester artejan danter le Südtirol y l’Austria. “La proposta fata dal assessur Achammer prevëiga che i artejans po se fà reconësce sü diploms inće tl’Austria, ći che por le momënt ne é nia poscibl”, spliga Kompatscher.
rc
