Atualità
„Garanzia por la jonëza” tl Südtirol:Les mosöres gnarà presentades ai 10/07
Le fin dl conzet “Garanzia por la jonëza” é chël da podëi ti pité a porsones sot ai 25 agn n post de laûr o n post de formaziun. La descriziun dles mosöres preodüdes dala “Garanzia por la jonëza” tl Südtirol gnarà presentada dal’assessuria Martha Stocker y dal assessur Philipp Achammer en jöbia, ai 10 de messè a Balsan.
Dan da n ann à i stać dl’Uniun Europeica fat fora da svilupé n conzet sön le smendrimënt dla dejocupaziun di jogn tl’Europa. Le fin dla “Garanzia por la jöneza” é chël da rové a podëi pité a düć i jogn sot ai 25 agn n post de laûr, n post de formaziun o pro n curs de formaziun. Inće tl Südtirol él gnü laurè sön mosöres te chësc vers che gnarà śëgn presentades.
Tl zënter dles mosöres cuntra la dejocupaziun jonila é dantadöt i jogn danter i 15 y i 24 agn, che é tl laûr da chirì n’ocupaziun o che n’à nia stlüt jö n stüde. Inće sce la dejocupaziun di jogn é cun 12 porcënt plü bassa co tl rest dla Talia, éra impò chersciüda ti ultimi agn.
I Ofizi y le Departimënt por le laûr y por la promoziun dl stüde, sciöche inće i Ofizi de consulënza por le laûr à insciö laurè fora de plü mosöres, dantadöt por i jogn ćina ai 25 agn. La situaziun di jogn sön le marćé dl laûr sciöche inće la descriziun dles mosöres preodüdes dala “Garanzia por la jonëza” tl Südtirol gnarà presentades dal’assessuria por le laûr Martha Stocker y dal assessur por la formaziun Philipp Achammer adöm cun de plü rapresentanć dl Departimënt Laûr en
jöbia, ai 10 de messè 2014
dales 9.30
tla curt interna dl Palaz Widmann
plaza Silvius-Magnago 1, Balsan.
Düć i media é dër bel invià a to pert.
rc
