Atualità
Concurs de musiga popolara dles Alpes a Desproch: Iscriziuns ćina al 01/08
Le 21ejimo concurs de musiga popolara dles Alpes gnarà tigni dai 23 ai 26 de otober a Desproch. Le concurs vëgn organisé dal’Uniun dla musiga popolara dl Tirol, adöm cun les scores de musiga todëscia y ladina dl Südtirol y cun d’atres uniuns de musiga dl Paiern y dl’Austria. An po se scrì ite ćina al 01/08.
Vigni dui agn s’incunta n gröm de musicontri y ćiantarins dl’Austria, de Paiern, dl Südtirol y dla Svizra por tó pert al plü gran concurs alpin sön la musiga popolara tradizionala, le “Alpenländischer Volksmusikwettbewerb/Herma Haselsteiner-Preis”.
Öna dles atraziuns dl concurs é dessigü le conferimënt dl pest “Herma Haselsteiner” che vëgn surandè dal mezenn Hans Peter Haselsteiner, le möt de Herma Haselsteiner, che é stada por agn alalungia la suranstanta dl’Uniun dla musiga popolara dl Tirol. Tratan le concurs gnaràl dè jö indöt 180 valutaziuns, partides sö danter valutaziuns de grup y de solisć. Les valutaziuns gnarà conzedüdes aladô dl’interpretaziun musicala, dla particolarité dles espresciuns regionales y dl’espresciun musicala dl grup o dl solist sot ejam. Le concurs ne é insciö nia ma na poscibilité por se mosorè cun i mius talënć dla musiga popolara mo inće por imparè a conësce les particolaritês de de plü regiuns dles Alpes.
Le program dl concurs prevëiga de plü incuntades danter i musiconć, na festa da bal, manifestaziuns musicales tl zënter dla cité sciöche inće n gran marćé cun trohts y stromënć y na gran mëssa tl dom de Desproch.
Iscriziuns po gnì fates ćina al 1. de agost.
La plata internet cun dötes les informaziuns: http://www.tiroler-volksmusikverein.at
rc
