Atualità
Scora ladina: L’insegnamënt plurilingual é gnü amplié dala Junta
L’insegnamënt de na materia scolastica te n lingaz forest, che é gnü esperimentè dal 2011 inant tles scores altes ladines, é gnü aprovè inier, mertesc ai 8 de messè, dala Junta provinziala.
Aumentè les competënzes spezifiches dla materia y promöie les conescënzes linguistiches: chësc é le fin dl’aprovaziun dla deliberaziun da inier (08.07) sön l’insegnamënt plurilingual tles scores altes ladines da pert dla Junta provinziala dl Südtirol sön proposta dl assessur por la scora ladina Florian Mussner. „Na materia scolastica vëgn insciö insignada en pert te n lingaz forest, chësc ne aumentëia nia ma la segurëza ti confrunć di atri lingac europeics mo inće les competënzes spezifiches te vigni materia”, à dit l’assessur por la scora ladina Florian Mussner che s’à mostrè contënt dl ampliamënt. „Tles scores ladines unse porvè fora chësc percurs bele dal 2011 inant, cun l’insegnamënt de na materia te n lingaz forest tles cuartes tlasses y nos sun sigüsc, che l’ampliamënt dles competënzes linguistiches é al dedaincö na componënta nezesciara por la convivënza tl’Europa“, insciö Mussner. L’insegnamënt te n lingaz da foradecà ne é nia ma conzentrè sön l’inglesc, mo po gnì amplié a düć i lingac che vëgn insignà tles scores altes ladines.
L’insegnamënt à na dorada de altamo dui ćina alplü cinch agn scolastics y prevëiga indöt n minimum de 68 y n mascimo de 102 ores d’insegnamënt (partides sö te düć i agn d’insegnamënt). Les competënzes linguistiches di maestri, por podëi insigné te n lingaz forest, mëss ti corespogn ai criters dl cheder europeich de referimënt por la conescënza di lingac. L’insegnamënt piarà ia cun le proscimo ann academich, 2014-15.
rc
