Atualità
Mussner incunta la direturia nöia di Bëgns Culturai Kofler Engl
La sconanza di bëgns culturai é stada la tematica zentrala tratan l’incuntada danter l’assessur provinzial competënt Florian Mussner y Waltraud Kofler Engl, nominada da püch dala Junta provinziala sciöche direturia nöia dla Repartiziun Bëgns Culturai.
„Por merit dla gran esperiënza sciöche direturia dl Ofize Bëgns architetonics y artistics à Waltraud Kofler Engl dötes les premisses nezesciaries por condüje la Repartiziun Bëgns Culturai cun sënta tl Palaz Rottenbuch“, à sotligné l’assessur provinzial Florian Mussner. Tratan la pröma incuntada cun la direturia nöia él inće gnü tratè de plü chestiuns por ći che reverda les ativitês tl dagnì tl ćiamp di bëgns culturai, dandaldöt dla nezescité dla sconanza y proteziun di bëgns culturai y storics por les proscimes generaziuns. „Nosta inćiaria é chëra da garantì la conservaziun dla arpejiun materiala de nosc passè, dai monumënć d’ërt, ai monumënć storics ćina ales testimonianzes scrites, mo inće da la studié y da ti la trasmëte ales proscimes generaziuns“, à dit la direturia Kofler Engl.
L’assessur Mussner y la direturia Kofler Engl à inće albü l’ocajiun da se confrontè sön scomenciadies poscibles tl setur scolastich, cun le fin da sensibilisé y da fà capì dandaldöt ai jogn les tematiches sön la sconanza di bëgns culturai. Waltraud Kofler Engl é nasciüda a Terenten y à studié storia y storia dl’ërt a Desproch y Firenze. Dal 1896 laôrara pro la Repratiziun Bëgns Cultuai y dal 1995 éra direturia dl Ofize Bëgns architetonics y artistics, che adöm cun l’Ofize Bëgns archeologics y l’Archif dla Provinzia fej pert dla Repartiziun Bëgns Culturai.
rc
