Atualità
La brosciüra nöia di „Museums dl Südtirol“ é tosc desponibla
128 museums, coleziuns y posć d’esposiziun vëgn presentà te na brosciüra nöia, ajornada y che vëgn dada fora dala Repartiziun Museums. Tla publicaziun nöia pon ciafè dötes les informaziuns ütles sön orars de daurida, numers de telefon, misciuns email, adresses y de cörtes descriziuns sön i museums. La brosciüra nöia gnarà tosc partida fora debann ti museums y ti ofizi por le turism.
L’assessur por i museums Florian Mussner vëiga la publicaziun nöia sciöche n impuls por s’informè sön l’oferta museala te Südtriol: „Tl Südtirol ùnse n patrimone rich de museums y chësc pice liber é inće n invit por vijité i museums“. Les brosciüres nöies dla Repartiziun Museums contëgn informaziuns generales sön 128 museums tl Südtirol y les presentëia te na forma compata y scëmpla. Ala fin dl pice sföi d'informaziun él inće na mapa cun les indicaziuns geografiches sön la posiziun de museums, coleziuns y posć d’esposiziun. La brosciüra é gnüda publicada ti lingać todësch, talian y inglesc. Tla descriziun di museums ladins pon inće ciafè na cörta descriziun n ladin. La brosciüra informëia sön orars de daurida, numers de telefon, misciuns email, adresses y pita inće descriziuns sön i museums y sön i punć zentrai dles coleziuns.
I museums, les coleziuns y i posć d’esposiziun é partis sö aladô de süa posiziun geografica, da vest a ovest, les tematiches é la cultura, l'ert, la natöra y la tecnica. Nü laprò é la presentaziun di posć d’esposiziun dl’ert moderna tl Südtirol. La brosciüra nöia „Museums tl Südtirol“ gnarà tosc partida fora ti museums, te istituziuns culturales y ti ofizi por le turism. Ara po inće gnì apostada tres na email a museen@provinz.bz.it. Por chi che ô di dè n’odlada online, po le fà tlichan chilò.
rc
