Atualità
Cater peres miliares romanes ciafades a Vintl: presentaziun ai 8 de agost
Bele tl’eté romana êl na strada che passâ tres la Val de Puster y che ê un di coliamënć de transiziun prinzipai amesa les Alpes. Da püch él gnü ciafè sön la trata antica dla strada romana cater peres miliares dlungia la localité de Vintl de Sura y che gnarà presentades dal Ofize Bëgns archeologics en dodoman, vëndres ai 8 de agost a Frangart.
Tratan i laûrs te na cava de giara a Vintl de Sura él gnü descurì cater peres miliares dl’eté romana, de chëstes cater n'él almanco döes che vëgn datades incër le terzo secul do G. Crist. Les peres é gnüdes descurides sön la trata dl percurs dla strada romana che porta tres la Val de Puster y che fajô pert dl’aministraziun dla Provinzia romana dl Noricum. Cun chësta decurida él gnü ciafè indöt 15 peres miliares tla Val de Puster, deplü co te döt le rest dl Südtirol y che testemoniëia insciö la presënza dla strada sciöche coliamënt important amesa les Alpes.
L’importanza dla descurida vëgn inće sotrissada dal Ofize Bëgns archeologics, che à laurè fora n conzet d’esposiziun che ti gnarà portè dant en vëndres, ai 8 de agost, ai rapresentanć di Comuns olache les peres miliares é gnüdes ciafades.
Do la presentaziun ai rapresentanć comunai tignarà Catrin Marzoli, direturia dl Ofize Bëgns archeologics, na conferënza stampa de presentaziun dles peres miliares y dl conzet d’esposiziun.
L’apuntamënt por la conferënza stampa é dodoman,
en vëndres, ai 8 de agost,
dales 10.45
tl archif archeologich dl Ofize Bëgns archeologics
a Frangart (fraz. De Eppan),
strada Balsan 59.
rc
