Atualità
Scora ladina: Assegnà indöt 14 posć a tëmp indeterminé
10 posć tles scores altes y mesanes y cater posć tles scores elementares: ai 7 de agost él gnü assegné a Balsan tla sënta dl’Intendënza ladina i posć de rode y i contrać a tëmp determiné tles scores elementares, mesanes y altes ti comuns dla Val Badia y Gherdëna.
"Cun gran ligrëza él chësc ann stè poscibl da assegné 14 posć de rode tles scores elementares, mesanes y altes de Gherdëna y dla Val Badia. Chësta é na zifra dër importanta cun chëra che al vëgn cherié les fondamëntes por avëi na continuaziun y stabilité dl insegnamënt tles scores dles localitês ladines“, à dit l’assessur por la scora ladina Florian Mussner che s’à mostrè contënt che prësc düć i posć scrić fora à podü gnì assegnà.
L’interès da ciafè n post sciöche maester y insegnant tles scores ladines é gran y chësc àn inće podü odëi inier, jöbia ai 7 de agost tla sënta dl’Intendënza ladina tla strada Binder nr. 27 a Balsan, canche n gran numer de candidać s’à presentè al’assegnaziun di posć de rode y di contrać a tëmp determiné dl personal insegnant dles scores tles localitês ladines. „L'assegnaziun de chësc ann é na buna ocajiun por stabilisé na pert dl personal insegnant y che se dà l’ocajiun da planifiché le dagnì dla scora ladina cun plü segurëza y stabilité“, à splighé l’Intendënt dla scora ladina Roland Verra.
Por ći che i posć de rode por insegnanć dles scores altes y mesanes él gnü assegné (tles scores altes) dui posć por l’insegnamënt dl lingaz y dla cultura ladina, trëi posć por l’insegnamënt de materies leterares y dl todësch, un n post por l’insegnamënt dles sciënzes naturales, chimica, geografia y microbiologia, (por les scores mesanes) un n post por l’insegnamënt dl ladin, un n post por l’insegnamënt dl talian, storia, educaziun zivica y geografia, un n post por l’insegnamënt dl inglesc y un n post por l’insegnamënt dla matematica y dles sciënzes naturales. Por les suplënzes anuales él inće gnü fat l’assegnaziun di posć ai 7 de agost sön la basa dla graduatoria provinziala.
rc
Galaria dales fotografies
