Atualità
Pröma sentada dla Consulta di Studënć: Fallaha é la suranstanta nöia
Milena Fallaha dl Lizeum d’Ert „Cademia“ da Urtijëi é la suranstanta nöia dla Consulta di Studënć por les scores altes dles localitês ladines. La pröma incuntada danter la Consulta di Studënć nöia cun l’Intendënt Roland Verra é gnüda tignida dan da püch a Urtiijëi, te chëra che an à inće rajonè dl proiet „Buona Scuola“. Johannes Geier rapresentëia la Consulta tl Consëi Scolastich provinzial.
To pert a incuntades a livel local, regional y provinzial, s’ativé por les ghiranzes di studënć dla scora alta ladina y colaborè cun les atres istituziuns dl monn dla scora: chisc é i compić prinzipai dla Consulta di Studënć ladina che é gnüda formada danü y che à albü süa pröma sentada ai 20 d’otober tl Lizeum d’Ert „Cademia“ a Urtijëi. „La Consulta à insciö le compit da cöi adöm les ghiranzes di studënć y da s’integrè inće tles debatüdes sön la scora a livel local, regional y nazional, sciöche inće da fà propostes sön la planificaziun di orars de scora, dles vacanzes y dl’organisaziun scolastica en general“, à splighè l’Intendënt por la scora ladina Roland Verra tratan la pröma incuntada. La Consulta di Studënć à inće na rapresentanza tl Consëi Scolastich provinzial, sciöche rapresentant él gnü litè le studënt Johannes Geier dl Lizeum d’Ert „Cademia“ da Urtijëi.
Tratan la pröma sentada él inće gnü tignì la votaziun por le suranstat nü / la suranstata nöia. Milena Fallaha dl Lizeum d’Ert „Cademia“ da Urtijëi é gnüda litada sciöche suranstanta nöia dla Consulta di Studënć por les scores altes dles localitês ladines. L’assessur por la scora ladina Florian Mussner ti aôda ala Consulta di Studënć nöia „n bun start y na buna colaboraziun cun i direturs y les direturies dles scores altes, cun la Consulta di Geniturs y cun les atres döes Consultes di Studënć dla scora todëscia y taliana.“
Al é gnü injuntè na fotografia dla suranstanta nöia, na foto de döta la Consulta di Studënć gnarà fata en ocajiun dla proscima incuntada.
rc
