Atualità
Maestri che nsënia ladin n vijita tl Istitut Ladin Micurà de Rü
Sun nvit dl Istitut Ladin Micurà de Rü iel dan da puech unit a se l dé doi ancuntedes cun i maestri che nsënia ladin tla scoles elementeres, mesanes y autes de Gherdëina y dla Val Badia.
La scumenciadiva nasc dala ulentà de nvië via na culaburazion cuncreta danter l Istitut Ladin y la scoles ladines. Do la prima sentedes ntrodutives te Sëlva (ai 25 de fauré) y a San Martin de Tor (ai 4 de merz), a chëles che à tëut pert de ndut ntëur n 60 persones, ulëssen mëter a jì uni ann n valguna ancuntedes danter i culaburadëures dl Istitut Ladin y i nsenianc che se dà ju cun l nseniamënt dl ladin y dla cultura ladina o che à nce nteres a chësta materies. Da pert dl Istitut Ladin ulëssen ti pité ai maestri na consulënza prufesciunela n cont dla rujeneda y nce na furmazion per chël che reverda i strumënc de lëur – libri, ma nia mé – che l Istitut à dat ora te truep ani de atività.
“L barat de nfurmazions y cunescënzes danter i maestri y l’Istitut Ladin ie de mpurtanza nce per l nserimënt de strumënc didatics nueves che alisirea l nseniamënt dl ladin tla scoles y per amplië la rë de culaborazion danter la istituzions cultureles y de furmazion didatica de nosta valedes”, nsci l Ntendënt dla scoles ladines Roland Verra.
N chësc cont iel nce bele unì prejentà n ucajion dla doi ancuntedes de plù strumënc de lëur on-line che ie da abiné sun la plata internet dl Istitut www.micura.it y de chëi che i maestri possa se nuzé. L se trata di dizioners on-line, dantaldut l dizioner Talian - Ladin de Gherdëina/Ladin de Gherdëina–Talian che ie da garat on-line da dezëmber dl 2014 inant. N cont di lëures lessicografics dl Istitut iel nce unì prejentà l proiet dl dizionar Talian - Ladin dla Val Badia/Ladin dla Val Badia-Talian, che vën iust laurà ora y de chël che n pudarà tosc se nuzé.
L ie po’ nce unì prejentà la bibliotech dl Istitut che à de ndut ntëur n 20.000 libri che n possa crì su tres n catalogh on-line, y l ie nce unì spiegà ciuna puscibiliteies che n à per se i mpresté ora. N auter strumënt che ie unì prejentà y che possa vester nce te tlas n gran aiut per l nseniamënt ie l dizioner ilustrà per mutons "Mi prima paroles".
Da ultimo iel mo unì mustrà n’autra sauridanza, y plu avisa l calënder dla manifestazions www.manif.it che ie unì pensà sciche aiut per la lies per coordiné miec l’atività culturela te Gherdëina y tla Val Badia y che pieta na sëuravijion dla manifestazions tla doi valedes.
L’ancuntedes ie nce unides metudes a jì per avëi n liam ndrët cun i maestri, che ie i prims a vester n cuntat, di per di, cun la rujeneda ladina y cun i bujëns y la deficulteies di sculeies, y perchël nce i prims a savëi de ciun strumënc de lëur che l jissa de bujën te scola per miuré l nseniamënt. Nce n chësc cont possen zënzauter pensé de lauré deberieda metan a jì scumenciadives y proiec nteressanc.
N spera nsci de vester boni, tres l’ancuntedes che unirà mo a se l dé, de nvië via na culaburazion che possa vester n var inant per la valorisazion dla rujeneda y dla cultura de nosc raions che dëssa unì nsenieda y zidleda pian via dai plu pitli.
USP
Galaria dales fotografies
