Atualità
Tornê de hockey interladin 2015: Le titul va ala seleziun de Gherdëna
La ediziun 2015 dl tornê de hockey danter les scores mesanes dles valades ladines, organisada dal Sorvisc Sport Scolastich dl'Intendënza Ladina de Balsan, é jüda a piz incö domisdé, vëndres ai 20 de merz, a Corvara. Jogadus de Gherdëna, dla Val Badia, de Fodom/Alleghe, de Ampëz y de Fascia à combatü por le titul „campiun de hockey interladin 2015“. Le pröm post é jü te Gherdëna.
Dal 2010 vëgnel organisé vigni agn n tornê de hockey danter les scores mesanes de Gherdëna, dla Val Badia, de Fodom/Alleghe, de Ampëz y de Fascia. I pröms dui agn é le tornê gnü metü da jì a Alleghe, daldô tl 2013 te Gherdëna y tl 2014 te Fascia, chësc ann spo tla Val Badia a Corvara. „Le tornê de hockey é oramai deventè na bela tradiziun danter les scores mesanes dles valades ladines. Le sport é öna dles ativitês scolastiches che ne porta nia ma para desfides danter i scolars y les scolares, mo che pitâ inće na buna ocajiun por se imparè da conësce y por s’incuntè te na situaziun plajora“, dij l’assessur por la scora ladina Florian Mussner.
Les partides à metü man dales 9.00 tl Stadium dla dlacia “Albert Pezzei”. Vigni valada ê rapresentada al tornê cun öna na scuadra y à soghé cun dötes les scuadres dles atres valades. Le pröm post à arjunt la seleziun de Gherdëna, al secundo post é rové Fodom/Alleghe, al terzo Ampëz, spo s'à tlassifiché cuarta la seleziun de Fassa y cuinta la Val Badia. Dl'organisaziun dla manifestaziun sportiva s'à fistidié le Sorvisc Sport Scolastich dl'Intendënza Ladina de Balsan. Les copes y les medaies dla manifestaziun é gnüdes metüdes a desposiziun dala Cassa Raiffeisen.
rc
Galaria dales fotografies
