Atualità
OK dal Consëi scolastich al dessëgn de lege sön la reforma scolastica
Le Consëi scolastich cun a cé la presidënta Edith Ploner á dé inier ai 18 de jená so arat positif al dessëgn de lege provinziala por l’atuaziun dla reforma statala „La Buona Scuola“ (lege n. 107/2015) te Südtirol.
Ara é gnü tignida inier, lönesc ai 18 de jená, la sentada dl Consëi scolastich cun a cé la presidënta Edith Ploner tratan chëra che le Consëi á dé süa valutaziun positiva al dessëgn de lege provinziala por l’atuaziun dla reforma statala tlamé „La Buona Scuola“ (lege n. 107/2015) te Südtirol. Cun le dessëgn de lege vëgnel rezepí a livel provinzial la reforma dl sistem scolastich y dla formaziun aprové de messé dl 2015, tignin cunt dles carateristiches locales cun de plü mudaziuns che reverda normes bele varëntes tl setur dl sistem scolastich provinzial.
La lege 107/2015 se tol dant de amplié l’autonomia dles scores cun la definiziun de n plann trienal dl’oferta formativa, da renforzé l’ativité de ajornamënt di insegnanc y da potenzié les competënzes di direturs y dles direturies dles scores. Na pert dles novités reverda la pert didatica, danter l’ater la poscibilité da adoré personal spezialisé tles scores elementares, por ejëmpl por les materies de sport, musiga y inglesc, aziuns cuntra l’arbandonn scolastich y l’introduziun de n portfolio personal de vigni studënt por documenté le percurs scolastich.
Un di aspec prinzipai dla reforma é chël dl’introduziun de n plann trienal de oferta formativa, colié ala valutaziun interna dles istituziuns scolastiches cun la partezipaziun de dötes les istituziuns scolastiches.
Tratan la sentada él implü gnü aprové de plü propostes de mudaziun rovades al Consëi tles edemes da denant da pert di componënc di organs de consultaziun. Al é preodü che la lege nöia ais valënza dal 1 de setëmber dl 2016 inant cun n valgügn articui che gnará aplicá cun le scomenciamënt dl ann scolastich 2017/18. L’iter dl dessëgn de lege, aprové dal Consëi scolastich provinzial, gnará sëgn tosc traté dal Consëi provinzial.
rc
