Atualità
Stipendiums, aproaziun ala bandida por l’ann academich 2016/17
La Junta provinziala á da püch aprové la bandida che reverda i stipendiums por l’ann 2016/17 y mët a desposiziun 13 miliuns por chi che fej l’Université.
Al é de indöt 13 miliuns de euro le sostëgn garantí dala Provinzia de Balsan ai studënc südtirolej che frecuentëia n’Université o scores y istituziuns de istruziun y de formaziun tecnica do la matura. La Junta provinziala á insciö dé süa aprovaziun ala bandida por l’azes ai stipendiums, cun i fonds che gnará spartis sö por 10 miliuns por chi che stüdia alfinfora di confins provinziai y i atri 3 miliuns por ci che fej cursc tl Südtirol.
La soma de vigni stipendium depënn aladô dla situaziun dl davagn y dl patrimone di geniturs y dla familia, cun na soma minimala cina ai 1.700 euro cina al mascimo 5.800 euro al ann. Le pröm termin „tecnich“ por la presentaziun dles domandes é ai 15 de setëmber, l’ultim termin por fá domanda é indere gnü fissé ai 2 de novëmber dl 2016. Por de plü detais prëibel vijité la plata internet aposta o contaté l’ofize tres email (dirittostudio.universitario@provincia.bz.it).
Le Sorvisc "Stipendiums por studëntes y studënć che frecuentëia istituziuns universitares o scores altes profescionales" é da ciafé tlican chiló.
rc
