Atualità
D’autonn saral 70 sculeies de plu tla scoles ladines
La cumpëida de sculeies tla scoles elementeres y mesanes dla valedes ladines ie aumenteda. N dut saral chëst ann 3.150 sculeies. „D’autonn saral tla scoles elementeres y mesanes de Gherdëina y dla Val Badia 70 sculeies de plu, se ncunforta l assessëur ladin Florian Mussner.
Bën cater tlasses à messé unì juntedes pra la scoles mesanes per via dla majera cumpëida de sculeies. Tla scoles elementeres nen iel unì juntà trëi. „Unfat ie resteda la cumpëida di sculeies pra la scoles autes“ dij Alfredo Irsara, diretëur de ripartizion per cultura y scola ladina. Tl ann de scola che à da unì saral tla 15 scoles elemeteres ndut 94 tlasses. La sies scoles mesanes ladins cumpëida 42 tlasses, ntant che la scoles autes nen avrà 18. Te Gherdëina saral tl ann de scola 2003/04 ndut bën 1.674 sculeies y jëuni tla scolines, scoles elementeres, - mesanes y - autes. Tla Val Badia nen saral 1.476 mutons y jëuni. Tla scola profesciunela te Gherdëina y tla Val Badia ie scric ite 75 sculeies, tla scola d’ert nen iel 74. Sce n cumpëida adum duc i luesc ladins dla Provinzia de Bulsan pona ruven a na cumpëida de 3.150 sculeies y studënc. „Ndut iel d’autonn 70 sculeies de plu tla elementera y mesana“, se ncunforata l assessëur Mussner. Nce pudëi mantenì la sezions esternes dla direzions scolastiches ie na bona, dij Mussner. „L me ie de mpurtanza che n possa mantenì la pitla scoles ti pitli luesc“ sorissea l assessëur Mussner. Tla scoles ladines à 202 maestri na stiera de ruolo. 16% di maestri lëura a mez tëmp. „Tla scoles ladines uniral nce chëst ann metù a ji de plu proiec, ulache l vën danterauter nce dat truep pëis ala cumpetënza linguistica“, nsci Florian Mussner. Te duta la scoles mesanes vëniel nsenià nglëisc. Tla scoles elementeres y mesanes uniral jit inant cun l proiet linguistich tres nsenianc aposta. Una maestra sëurantulerà nce la mediazion interculturela. Tla scola mesana de Urtijëi uniral jit inant cun n proiet de direzion musichela. Nce l nseniamënt de informatica, nsci se la damanda la riforma scolastica, dessa chëst ann unì metù man tla scoles elementeres.OSP
