Atualità
Fin dl ann de scora: Messaje deboriada di trëi assessurs
Indoman se stlüj jö l’ann scolastich 2015/16 che á albü le focus sön l’adatamënt dla reforma scolastica “La Buona Scuola“ ala normativa provinziala.
Por les scores elementares, mesanes, altes y profescionales se röia l’ann de scora en jöbia ai 16 de jügn cun le scomenciamënt spo atira di ejams statai por i scolars dla terza tlassa dles scores mesanes. Ai 22 de jügn metará spo man i ejams de madoranza cun la pröma proa scrita.
L’ann de scora 2015/16 é sté por la scora ladina n’ann cun le focus dantadöt sön la partezipaziun y le dialogh danter düc i aturs dla scora ladina. „Öna de nostes priorités é stades chësc ann le renforzamënt dla rëi de colaboraziun danter la scora, les scolines y les families, ince por afronté deboriada tl dagní les sfidades nöies che reverda l’insegnamënt individual, les ativités extrascolastiches y les sfidades che vëgn dal’integraziun y intlujiun a chëres che scolars, geniturs y maestri mëss ti respogn aldedaincö“, á dit l’assessur por la scora ladina Florian Mussner. Na buna basa por le dagní é ince l’adatamënt dla reforma statala „La Buona Scuola“ ala normativa provinziala, deache ara ne renforzëia nia ma l’autonomia dles scores, mo ince la colaboraziun danter les scores y le monn dl laur, insciö Mussner. La presentaziun dles brosciüres söl integraziun di mituns migranc y dles mitans migrantes é ince stada n vare important por n’integraziun garatada, spliga l’assessur Mussner. „N ater pilaster important dla scora ladina romagn la promoziun dl plurilinguism y tl dagní gnará chësc setur ince analisé plü a funz cun na inrescida scientifica sön l’adoranza y l’aprendimënt di lingac“, insciö l’assessur por la scora ladina.
Ince por la scora taliana á l’ann scolastich apëna rové n ann important por de plü aspec. „Le plurilinguism, le monn dl laur y le scomenciamënt dl percurs portará n valgönes tlasses dla Formaziun profescionala a fá l’ejam de maduranza: chëstes é ma n valgönes dles tematiches strategiches dla scora de lingaz talian che vá inant cun n monitoraje costant dla cualité“, á dit l’assessur por la scora y cultura taliana Christian Tommasini. Te chësta direziun laora ince le Sorvisc de valutaziun che á svilupé n sistem de autovalutaziun dles scores y de analisa dles competënzes linguistiches dles scolares y di scolars dles scores elementares, dij Tommasini.
L’assessur por la scora todëscia Philipp Achammer á recordé en gaujiun dla fin dl ann de scora che chësc ann é sté n ann important sön de plü liví. Insciö ne él nia ma svilupé n ordinamënt nü che reverda le lernerat mo öna dles mosöres plü importantes é stada l’adatamënt dla reforma statala a livel provinzial. „Chësta reforma porta para por la scora todëscia na seria de inovaziuns importantes che dëida da mioré la cualité tles scores y da stabilisé le percurs de laur di insegnanc“, spliga l’assessur Philipp Achammer. Cun la reorgansaziun dla formaziun di lerneri él implü sté meso da renforzé le model de formaziun duala cun la poscibilité da podëi fá l'ejame de madoranza ince tres le lernerat, insciö Achammer.
A düc chi che rovará chësta edema l’ann de scora ti aoda i trëi assessurs y i intendënc scolastics Roland Verra, Peter Höllrigl y Nicoletta Minnei de beles vacanzes da d’isté y a chi che al ti aspeta ciamó i ejams finai dla scora mesana, alta y profescionala döt le bun y tröp suzes. N gran rengraziamënt ti vá ince a döt le personal scolastich, ai suranstanc y al personal aministratif por le gran laur fat y por avëi acompagné cun dediziun y entusiasm i mituns y les mitans tratan chësc ann de scora.
rc
