Atualità
Ejam de maduranza 2016: Tematiches dla pröma proa scrita
Incö mercui ai 22 de jügn á metü man por 99 studënc/tes tles scores altes dles valades ladines de Südtirol l’ ejam de stat 2016 cun la pröma proa scrita.
Indöt 99 studënc y studëntes é gnüs/gnüdes ametüs/des do la contlujiun dl ann scolastich 2015/16 al ejam de maduranza dles scores altes tles valades ladines. 8 é les candidates che tól pert al ejam de maduranza dla cuinta classa dl Lizeum Linguistich da La Ila, 13 i studënc y les studëntes dla cuinta classa dl Istitut Tecnich Economich da La Ila, 46 é i studënc ametüs al ejam de maduranza dla cuinta classa dl ITE Raetia y indöt 32 é les candidates y i candidac dl Lizeum d’Ert Cademia cun la Scora Profescionala por l’artejanat artistich da Urtijëi. La novité de chësc ann é che al vëgn fat por le pröm iade l’ejam de stat tla Scora Profescionala a Urtijëi – aladô dl’acordanza danter MIUR y la Provinzia autonoma de Balsan dl ann 2010.
Pro la pröma proa scrita, che é gnüda tignida incö (22/06) danmisde á i candidac dles scores ladines podü chirí fora da scrí la proa o por talian o por todësch. Les tematiches da traté é stades tröpes y dër desvalies, danter l’ater le conzet de “termo”, i mudamënc dl clima, le raport danter pere y fi tla leteratöra, mo ince l’importanza dl’amizizia, le valur dla contrada o le convent dl’autonomia te Südtirol. Le documënt cun i temesc dla pröma proa scrita é gnü injunté.
La secunda proa scrita reverda na materia che caraterisëia vigni singola tipologia de scora alta y á le fin da valuté les conoscënzes speziches dl studënt y dla studënta.
La terza proa scrita é partida sö te döes pertes y te dui dis. Le pröm de vëgnel scrit n tema te chël lingaz che ne é nia gnü adoré pro la pröma proa scrita. Le secundo de respogn i candidac a na ligna de domandes che reverda n valgönes materies chirides fora dala comisciun d’ejam. L’ejam de stat se stlüj jö cun la proa a usc che tol ite dötes les materies tratades tratan l’ultim ann de scora.
Indöt fej chësc ann 4024 studënc y studëntes l'ejam de maduranza, la plü gran pert é scrita ite te scores altes y profescionales todësces cun 2925 candidac, 1000 é i indere i candidac dles scores altes y profescionales talianes.
rc
