Atualità
S(ch)ein: Musiga y ert ai 14 d’agost tla fortëza Franzensfest
De plü epoches, musiga y ert s’incunta ai 14 d’agost sot al moto „Jüc delicac“ tl’esibiziun artistica „S(ch)ein“ tla fortëza de Franzensfest.
Dan da la culissa spetacolara dla fortëza de Franzensfest inviëia l’Ensemble SonnAiér y le grup di artisć Reflexio sot al moto „Jüc delicac“ ala rapresentaziun musicala y artistica „S(ch)ein: Proes de n’opera artistica intira“. Tres n’esibiziun artistica che atoca de plü epoches storiches, dantadöt dl tëmp baroch, mo ince di tëmps digitai d’aldedaincö, sona de plü musizisć sot ala direziun de Priska Comploi. Al sará da odëi y da aldí de plü melodies, dal plajor al melancolich, dai sonns ala realté. Le partezipant instëss sará na pert ativa dl’istalaziun: les löms y ambries se moscedará cun i sonns che acompagnará i vijitadus tratan le conzert sön n percurs de reflesciun cun tl zënter le conzet prinzipal dl evënt, la relaziun danter l’ester y la finziun. L’ispiraziun prinzipala dl conzet di musizisć y artisć é n pinsier dl scritur y poet inglesc William Shakespear „We are such stuff. As dreams are made on; and our little life. Is rounded with a sleep”.
Le conzert gnará soné dal ensemble „SonnAiér“, de chël che al fej pert plü artisć ladins spezialisá tl’esecuziun de musiga antica. I artisć é Priska Comploi, Nathan Chizzali, Esther Crazzolara, Vittorio Zanon y la solista Aura Elene Gutièrrez. Le program prevëiga l’esecuziun de plü operes de componisć dl tëmp baorch Andrea Falconieri, Barbara Strozzi, Dario Castello, Heinrich Ignaz Franz Biber, Tarquinio Merula, Alessandro Poglietti, Benedetto Ferrari y Biagio Marini, y ince n’opera dl composit svizer contemporan Nadir Vassena, che gnará sonada söi stromënc dla perioda musicala baroca. Les istalaziuns artistiches é gnüdes realisades dal grup de artisć internazionai „Reflexio“ che sará da odëi al intern dla fortëza.
Düc i interssá é inviá a tó per ala manifestaziun culturala, che vëgn sostignida dala Repartiziun cultura ladina, en domënia, ai 14 d’agost a Franzensfest dales 20:00. L’entrada é de 20 euro. Por plü informaziuns y por aposté les chertes pón scrí ala misciun email info.seinschein@gmail.com o telefoné a 3466762336.
rc
Galaria dales fotografies
